விகடனில் இருந்து இரா.சரவணன் ராஜினாமா..!

இரா.சரவணன்

வெளியில் கடுமையான வெயில்.இதழ் முடிக்கும் நேரம்.'கழுகார்' வருவாரா மாட்டாரா என்று பதற்ற‌த்துடன் காத்திருந்தோம்.

திடீரென்று ஒரு குறுஞ்செய்தி.

செய்திகள் அனைத்தையும் மின்னஞ்சல் மூலம் அனுப்பி விட்டேன்.எடுத்துக் கொள்ளுங்கள்.முக்கிய செய்தி மட்டும் நேரில் சொல்கிறேன் என்று.

நேரத்தைச் சரியாகப் பின்பற்றுவதில் கழுகாரை மிஞ்ச ஆள் இல்லை என்று பெருமைப்பட்டுக் கொண்டோம்.

சொன்னபடி சிறிது நேரத்தில் ஆஜர் ஆனார்.கழுகார்.அவருக்கு வெயிலுக்கு குளுமையாக மோர் கொடுத்தோம்.நம்மை நன்றியுடன் பார்த்தவர்,அனுப்பிய செய்திகளை எடுத்துக் கொண்டீரா ? என்றார்.

ஆம்.ஏதோ துணுக்குச் செய்தி தருவதாகச் சொன்னீரே...அதுக்காகத் தான் வெய்ட்டிங் என்றோம்.

அதானே..! காரியத்தில் எப்பவும் கண்ணாய் இருப்பீரே என்றார்.

நமது புன் சிரிப்பைப் பார்த்தவர் சொல்லத் தொடங்கினார்.

ஒரு முக்கிய செய்தி விகடன் வட்டாரத்தில் இருந்து சொல்றாங்களே உமக்கு தெரியுமா என்றார்.?

என்ன என்றோம் ஆர்வத்தை வெளியே காட்டாமல்.

இரா.சரவணன் விகடன் பப்ளிகேஷன்சில் இருந்து ஆசிரியர் பதவியை ராஜினாமா பண்ணிட்டாராமே..!என்றார்.

உண்மையா ? என்றோம்.

ஆமாம்.

எதுக்கு..?அங்கே ராஜமரியாதையா நல்லாத் தானே இருந்தார் என்றோம்.

முழு விபரமும் சொல்றேன்.ஆனா எதும் குறுக்கே பேசி என்னை டிஸ்டர்ப் பண்ணக் கூடாது என்றார்.

சரி என்று உறுதிமொழி அளித்தோம்.

ஏற்கனவே நாம்  சரவணனுக்கு செக் வைப்பதற்காக கலைச் செல்வன் என்பவரை விகடன் பப்ளிகேஷனில் நியமித்திருக்கிறார்கள் என்று சொல்லியிருந்தோம்.

அப்பொழுதே இரா.சரவண‌னுக்கு கொஞ்சம் எரிச்சலாம்.ஆனால்அதனை வெளிப்படுத்தாமல் அமைதியாக இருந்திருக்கிறார்.

இந்த நிலையில் விகடனில் இருந்து அசோகன் வெளியேறியதால் அவர் வகித்த பதிப்பாளர் உள்ளிட்ட பொறுப்புகளுக்கு மாற்று நபரை அலுவலகத்தில் நியமித்திருக்கிறார்கள்.அதன்படி ஆனந்த விகடன்,டாக்டர் விகடன், உள்ளிட்ட 6 விகடன் குழும இதழ்களுக்கு இரா.கண்ணன் பதிப்பாளராய் பொறுப்பேற்றிருக்கிறார்.

அப்படின்னா ஜூனியர் விகடனுக்கு என்று குறுக்கிட்டோம்.?

குறுக்கே பேசக்கூடாது என்ற நிபந்தனையின் பேரில் தான் நாம் பேசிக் கொண்டிருக்கிறோம் என்றார் கோபத்துடன்.

மன்னிக்கணும் என்றோம்.

ஜூனியர் விகடன் மற்றும் விகடன் பப்ளிகேஷன்ஸ் பதிப்பாளரா திருமாவேலனை நியமித்திருக்கிறது நிர்வாகம்.

அப்படின்னா சரவணன்..?

முறைத்தார் கழுகார்.

அமைதி காத்தோம்.

திருமாவேலனின் கீழ் பணியாற்றுவது தனக்கு இயலாத காரியம் என்று நினைத்தாரோ என்னவோ,கடந்த வாரம் இரா.சரவணன் அலுவலகத்தில் ஆ.வி.ஆசிரியர் மற்றும் பதிப்பாளர் ரா.கண்ணன் அவர்களைச் சந்தித்து ஒரு கடிதத்தை நீட்டியிருக்கிறார்.

என்ன என்று ரா.கண்ணன் கேட்க,எனது ராஜினாமா கடிதம் என்று சொல்லியிருக்கிறார்.

ரா.கண்ணன் அதிகமாக எதுவும் பேசாமல்,நீங்கள் திருமாவேலனிடம் கொடுத்திடுங்க.அவர் தான் இப்ப பப்ளிகேஷனுக்கு பதிப்பாளர் என்று சொல்லியிருக்கிறார்.தன்னிடம் இது குறித்து ரா.கண்ணன் விரிவாகப் பேசுவார் என்று எதிர்பார்த்தவருக்கு இது பேரதிர்ச்சி.

இதை எதிர்பார்க்காத சரவணன் அடுத்து திருமாவேலன் அவர்களைச் சந்திக்கச் சென்றார்.

சொல்லிய கழுகார் ஒரு இடைவெளிவிட்டு நம்மை ஏறிட்டுப் பார்த்தார்.

முக்கியமான நேரத்தில் சஸ்பென்ஸ் வைப்பதே உமது வேலையாப் போச்சு என்று கோபித்துக் கொண்டோம்.

அதனை மெல்லிய சிரிப்புடன் ரசித்தவர்  தொடர்ந்தார்.

உம் ஆர்வம் புரிகிறது.

திருமாவேலனுக்கும் இரா.சரவணனுக்கும் எப்பொழுதும் ஏழாம் பொருத்தம்.அவரை இவர் சந்தித்தாரா என்று தானே ஆர்வம் காட்டுகின்றீர் என்றார்.

பதில் சொல்லாமல் நாமும் சிரித்தோம்.

தன்னை சரவணன் சந்திக்க வந்துள்ளார் என்ற‌வுடன்,என்ன விஷயம் என்று பதிப்பாளர் திருமாவேலன் கேட்டுள்ளார்.

சரவண‌ன் நீட்டிய கடிதத்தைப் படித்த திருமாவேலன் மரியாதைக்காய் அவரிடம் ஓரிரு வார்த்தைகள் பேசிய பின்,ராஜினாமாவை ஏற்றுக் கொண்டு,உடனே இவரைப் பணியில் இருந்து விடுவித்து விடுங்கள்  என்ற குறிப்பை அதில் எழுதி அனுப்பி விட்டார்.

இப்பொழுது நீர் பேசலாம் என்று நமக்கு அனுமதி கொடுத்தார்.

அப்பாடா என்று பெருமூச்சு விட்ட நாம்,திடீரென்று ராஜினாமாவுக்கு என்ன அவசியம் என்றோம்.

இது குறித்து ஊகமாகத் தான் அலுவலகத்தில் பேசிக் கொள்கிறார்கள்.

திருமாவேலனுக்கு கீழ் தன்னால்,முன்பு போல் சுதந்திரமாக தன் விருப்பப் படி பணியாற்ற முடியாது என்று நினைத்து ராஜினாமா கடிதம் கொடுத்தார் என்றும்,இல்லை திரைப்பட இயக்குனர் சசிக்குமாரின் அடுத்த படத்தில் வசனம் எழுதும் வாய்ப்பு கிடைத்துள்ள‌து என்று சிலரும் இல்லை ஹிந்து தமிழ் நாளிதழுக்கு வேலைக்குச் செல்கிறார் என்றும் சொல்கிறார்கள்.

இன்னொரு தரப்பு வேறொரு காரணமும் சொல்கிறது.

என்ன என்றோம்.?

ராஜினாமா செய்ய சரவணனுக்கு உண்மையில் விருப்பம் இல்லையாம்.ராஜினாமா கடிதம் கொண்டு சென்ற தன்னை ரா.கண்ணன் சமாதானப் படுத்துவார்,நாம் திரும்பப் பெற்றுவிடலாம் என்று எதிர்பார்த்தாராம்.ஆனால் கண்ணனோ என்ன காரணத்தாலோ இவர் ராஜினாமாவை திரும்பப்பெற வலியுறுத்த வில்லையாம்.

இதனை எதிர்பார்க்காத சரவணன் வேறு வழியின்றி ராஜினாமா செய்தார் என்றும் சொல்கிறார்கள்.

எது உண்மையோ யாருக்குத் தெரியும் அவராகச் சொன்னால் தான் தெரியும்.என்றார்.

கடும் வெயிலில் சூடான செய்தியுடன் உள்ளே வந்த கழுகார் கிளம்பும் நேரத்தில் வெளியே மழை தூறியது.நாம் மழைக்கு இதமாக ஒரு சூடான தேநீர் கொடுத்தோம்.
நம்மை நன்றியுடன் பார்த்தவர்,இந்த தேநீருக்காக உமக்கு இன்னொரு விகடன் செய்தி விரைவில் சொல்றேன் என்றார்.

நாம் சிரித்தபடி அவரை வழியனுப்பினோம். 

தந்தி டிவியில் நித்தியானந்தா அருள்வாக்கு...?

சமீப‌காலமாய் அடங்கியிருந்த‌ நித்தியானந்தா ஏதாவது ஒரு சேனலில் தனது நிகழ்ச்சி தொடர்ந்து ஒளிபரப்பாக வேண்டும்,அதன் ,மூலம் திரும்பவும் பாப்புலாரிட்டியில் திளைக்க வேண்டும் என்று கையில் கரன்சியை வைத்து அலைந்துகொண்டிருந்தான்.காசினைக் கொட்டிக் கொடுக்கத் தயாராய் இருந்தாலும் இந்துத்துவ பின்னணி கொண்ட லோட்டஸ் டிவி மட்டும் தான் அவன் கையில் கிடைத்தது.

ஆனாலும் அதிகப் பார்வையாளர்களை சென்றடையும் தொலைக்காட்சி கிடைத்தால் நல்லது என்ற எண்ண‌த்தில் வலையை வீசிக் காத்திருந்தான்.

சன்,ஜெயா,கலைஞர் போன்ற சேனல்களில் வாய்ப்பில்லை என பலவாறாக கனக்குப் போட்டு இறுதியாக பு.த.தொலைக்காட்சியை அணுக முடிவு செய்தார். புதிய தலைமுறை பச்சமுத்துவை வெளிநாட்டு ‘கருப்பு முதலைகள்’ வழியாக பிடித்து பேசினார். கேவலமா நாடு சிரிச்ச ஒருத்தனை நமது சேனலில் காட்டுவதா என அந்தக் கருப்பு உள்ளமும் நல்லபடியாகச் சிந்தித்ததோ என்னவோ, ‘சேனலுக்கும் எனக்கும் பொறுப்பில்லை. பையன்தான் எல்லாமும் பார்த்துக்கொள்கிறார்’ என தூர நின்றார்.(தப்பிக்க நினைக்கும்,தவிர்க்க நினைக்கும் நேர‌ங்களில் எல்லா முதலாளிகளும் சொல்வது தான்)

உடனே மகன் சத்திய நாராயணனுக்கு அடுத்துள்ள சீனிவாசனை வேறு ஒரு தொடர்பில்
பிடித்து பேசியிருக்கிறார்.‘அந்த வேலை இங்க வேண்டாம். நான் இருக்கும் வரை உங்க நிகழ்ச்சி இங்க ஆகாது’ என கறாராகப் பேசியிருக்கிறார். இதற்காக டெல்லியில் உள்ள ஒரு இந்துத்துவா
கோஷ்டிதான் பேசியிருக்கிறது. இது எல்லாம் கருப்பு பண தொடர்பில் இருக்கும்
கும்பல் என்பது வேறு விஷயம். நாம் நித்தியின் விடா முயற்சிக்கு வருவோம்.

கடைசியாக பெருங்குடியில் இருந்து ஒளிபரப்பாகி வரும் தந்தி டி.வி.யிலாவது ஒளிபரப்பலாம். அது குறைவான பார்வையாளர்களை வைத்திருந்தாலும் பரவாயில்லை. அதிகப்படியான விளம்பர பொறுப்பை நாமே ஏற்கலாம் என பலவாறாக யோசித்துப் பதம் பார்க்கஅந்த சேன‌லில் உள்ள ‘இணைந்த கைகளான’ இருவர் குறித்து விசாரித்திருக்கிறார்கள்.

அருள்வாக்கு கூறும் நித்தியானந்தா

ஒருவர் அந்த தொலைக்காட்சியின் ஆல் இன் ஆல் சந்துரு.இன்னொருவர் நிகழ்ச்சித்
தயாரிப்பாளர் ராம்ஜி.ஏற்கனவே நிறையத் தொலைக்காட்சி நிகழ்ச்சிகளைத் தயாரித்துக்
கொண்டிருப்பவர்.

உடனே இருவரையும் பிடித்தார். வாரம் தோறும் ஒரு நிகழ்ச்சி. அல்லது தினமும் என்றாலும்

பரவாயில்லை என்றதும்....அடுத்து சில நாட்களில் இரண்டு பேரும் பெங்களுரு நித்தி

பீடத்திற்கே போய் சரண்டர் ஆனார்கள். (ஆ)சாமியிடம் பேசினார்கள்...பேசினார்கள்....பேசி முடித்தார்கள். நித்தியை கெட்டியாக பிடித்துக்கொண்டால் தனி சேனலையே தொடங்க சொல்லாம் என்ற தனி கணக்கு போட்டார்கள்.இப்போதைக்கு தந்தி தொலைக்காட்சியில் நித்தியின் நிகழ்ச்சியை ஒளிபரப்புவதென்று முடிவெடுத்தார்கள். உறுதி அளித்து முடித்தார்கள்.

எல்லாமும் கணக்கு பார்த்து வாய்நிறைய சிரிப்போடு திரும்பினார்கள். அதன் பிறகு இரண்டு முறை அங்கே சென்றார்கள். இவ்வளவு ஆகும் என்று பட்ஜெட் பட்டியலை நீட்டினார்கள்.

அதெல்லாம் பார்க்ககூடிய ஆளா நித்தி...அது இருக்கட்டும்..நீங்கள் எப்படி செய்கிறீர்களோ
அப்படியே செட்டு போட்டு எடுங்கள் என கூறிவிட்டார். இப்படி எல்லாமும் இறுதியாகி
படப்பிடிப்பு நடக்கும் நாளும் உறுதியாகியிருக்கிறது.
இறுதியில் நித்தியோடு ‘பக்தகேடிகள்‘ கலந்துகொண்டு கேள்விக்கு பதில்
என்னபடியோ, அல்லது சொற்பொழிவில் ஆன்மீகவாதிகளின் கேள்வி என்ற மாதிரியோ
எடுப்பதென‌ உள்ளார்க்ள்.

நித்தியானந்தா

அடுத்த வாரத் தொடக்கத்தில் எடுக்கிறார்கள். அதற்கான ஏற்பாடுகள் அனைத்தும். கடந்த
வாரத்தில் இருந்தே தொடங்கிவிட்டது. செட்டு போடுபவர்கள், கேமரா யூனிட், லைட்
செட்டிங் உள்ளிட்ட அனைவரையும் அழைத்து பேசிவிட்டார்கள். அனேகமாக ஆகஸ்டு மாதம்
இறுதியில் ஒளிபரப்பும் முடிவில் உள்ளார்கள். படப்பிடிப்பு பெங்களுரு பிடதி
பீடத்திலேயே..

தொலைக்காட்சி அலுவலகத்தில் 'நித்ய தர்மம்' விவாதம் என்று அறிவிப்பு பலகையில் எழுதிப் போட்டு அது குறித்த விவாதமும் நடக்கிறது.(இந்தப் பதிவு எழுதும் இந்தக்கணம்  பெங்களூரில் நித்தியானந்தா ஆசிரமத்தில் குளுமையான  தட்ப வெப்ப சூழ்நிலையில், தீவிர விவாதத்தில் ராம்ஜி ஈடுபட்டிருக்கிறார் என்பது கூடுதல் தகவல்)

(அலுவலகத்தில் நித்தியானந்தா நிகழ்ச்சி குறித்து முணுமுணுப்பு வந்ததும் நம்ம எம்.டி.அவரோட டிவோட்டி அவர் தான் பண்ணச் சொன்னார்,எங்களுக்கு ஒன்றும் சம்பந்தம் இல்லை என்று சொல்லி வாயை மூட வைத்திருக்கிறார்கள்.நிகழ்ச்சி ஒளிபரப்பானால் அது பலத்த விமர்சனங்களை ஏற்படுத்தும் என்பதும் தந்தி டிவிக்கு இருக்கும் கொஞ்ச நஞ்ச பார்வையாளர்களையும் ஓட வைத்து விடும் என்பதும் உறுதி. )

சாமியாரோ,போலிச் சாமியாரோ(சாமியார் என்றாலே போலி.இதில் போலிச்சாமியார் என்று
வேறு எழுதணுமா என்று நீங்கள் கேட்பது காதில் விழுகிற‌து.)
பக்தர்களிடம் காசு பிடுங்கிக் கொண்டு 'அருள் வாக்கு' கொடுப்பார்கள்.

ஆனால் இங்கோ நித்தியானந்தா சிலருக்கு 'தட்சணை' கொடுத்து, தொலைக்காட்சி பார்க்கும் அப்பாவி பக்தனுக்கு அருள்வாக்கு கொடுக்கிறார்.நித்தியானந்தாவை மடக்கிய இவர்கள் நிச்சயம் அவரை விட விவரமானவர்கள் தான்.பகிரங்கமாய் அம்பலப்பட்ட ஒரு பேர்வழியை வைத்து தொலைக்காட்சி நிகழ்ச்சி நடத்த துணியும் இவர்களின் தில்லு வேறு யாருக்கும் வராது என்பது உறுதி.

இப்படியே போனால் தொலைக்காட்சி ரேட்டிங் ஏறாது.சிலர் வங்கிக் கணக்கு இருப்பு ஏறும் என்பது மட்டும் நிஜம்.

கலாநிதி மாறன் vs பச்சமுத்து ;' கேடி பில்லா கில்லாடி ரங்கா '...!

இன்று காலை(11-07-2013) புதிய தலைமுறை தொலைக்காட்சியின் புதுப்புது அர்த்தங்கள் நிகழ்ச்சியில்,நேற்று உச்சநீதிமன்ற‌ம் குற்ற வழக்குகளில் 2 ஆண்டுகளுக்கு மேல் தண்டனை பெற்றவர்கள் தேர்தலில் நிற்கத் தடை விதித்தது குறித்தும் அரசியல் கிரிமினல்மயமாவது குறித்தும் சமூக அக்கறையுடன் கூடிய விவாதம்.

திரு.ஜென்ராம் நெறியாளுகை செய்து கொண்டிருந்தார்.(இன்றைய‌ நிகழ்ச்சியை மட்டுமல்ல எப்பொழுதும் சிறப்பாக நெறியாளுகை செய்கின்றீர்கள் சார்..பாராட்டுக்கள்)

ஆனால் நமக்கு வேறு ஒரு கவலை வாட்டிக் கொண்டிருந்தது.

அரசியல் கிரிமினல் மயமாவது குறித்து எப்படி உச்சநீதிமன்றம் கவலை கொண்டிருந்ததோ,அதைப் போல இந்த நாட்டின் தொலைக்காட்சிக‌ள்,செய்தித்தாள்க‌ள்,வானொலிகள் உள்ளிட்ட ஊடக‌ நிறுவனங்கள் கிரிமினல் பின்னணி உடையவர்களால் நடத்தப்படுவது குறித்தும் இத்துறை கிரிமினல்மயமாவது குறித்தும் தான் அந்தக் கவலை.

கருப்புப் பணம்,சுயநிதிக் கொள்ளை,அதிகார துஷ்பிரயோகம்,முறைகேடு,அரசு சொத்து அபகரிப்பு,இன்னும் என்னென்ன முறையற்றம் குறுக்கு வழி உண்டோ அவை அத்தனையையும் கடைப்பிடித்து பணம் ஈட்டியவர்கள் இத்துறைக்குள் புற்றீசலாய் இருப்பது குறித்த கவலை.

இன்று இத்துறையில் ஆக்டோபசாய் தொலைக்காட்சிகள்,வார இதழ்,விரைவில் செய்தித்தாள்,அரசியல் இதழ்,பதிப்பகம் என நுழைந்திருக்கும் எஸ்.ஆர்.எம்.குழுமத்தின் மீது நாம் மேற் சொன்ன அனைத்துக் குற்றச்சாட்டுகளும் உண்டு.

ஆனாலும் குறுக்கு வழியில் ஈட்டிய பல்லாயிரம் கோடிகளைக் காப்பாற்றுவதற்கும்,அதன் மீதான நாற்றத்தை மறைப்பதற்கும் பொது வெளியில் ஊடகம் மற்றும் அரசியல் என்று அந்த நிறுவனம் திட்டமிட்டுக் களமிற‌ங்கியிருக்கிற‌து.

எப்பொழுதும் எவனை,எப்படி மொட்டை அடிப்பதுன்னு சிந்திச்சுக்கிட்டே இருப்பீங்களா சார்...?

அவ்வாறு ஆரம்பிக்கப்பட்ட ஊடகங்களில் ஒன்றான புதிய தலைமுறை தொலைக்காட்சியில் தான், அரசியல் கிரிமினல் மயமாவது குறித்த கவலை காலை நேரத்தில்.

கடந்த இரண்டு நாட்களாக புதிய தலைமுறை தொலைக்காட்சிக் குழுமத்தின் முதன்மை நிறுவனமான‌ எஸ்.ஆர்.எம்.குழுமம் பல கோடி ரூபாய் மதிப்புள்ள் அரசு நிலத்தை அபகரித்த செய்திகள் அதிகார மட்டங்களிலும் ஊடகங்களிலும் நாற்றமடித்துக் கொண்டிருக்கின்ற‌ன.(எஸ்.ஆர்.எம்.பல்கலைக்கு எதிரான செய்தியை தினகரன் தவிர்த்து யாரும் வெளியிடவில்லை.அனைத்து முதலாளிகளுக்குள்ளும் அப்படி ஒரு ஒற்றுமை.)

10-07-2013 தேதியிட்ட தினகரன் நாளிதழ்

11-07-2013 தேதியிட்ட தினகரன் நாளிதழ்

இந்த நிலத்தின் மதிப்பு கொஞ்ச நஞ்சமல்ல.500 கோடி ரூபாய் சந்தை மதிப்பு உள்ள‌து.இது போன்ற நிகழ்வுகள் எல்லாம் பச்சமுத்து போன்றவர்களுக்கு சகஜம்.தங்களது இடத்திற்கு அருகில் எவர் இடம் இருந்தாலும் குறிப்பாக அரசு இடம் இருந்தால் அதனைத் தங்கள் இடமாக கருதி அதனை வளைப்பது ரத்தத்தில் ஊறிய ஒன்று.

தனியார் இடத்தை ஆக்ரமித்தால்,வலுவானவன் என்றால் அவர்களுடன் சமரசம் செய்வதும்,எளியவன் என்றால் அவர்களைப் பணிய வைப்பதும்,அரசுக்குச் சொந்தமான இடம் என்றால் கொடுக்க வேண்டியதைக் கொடுத்தும் விதிகளைத் தளர்த்தியும் பிரச்சனையை முடித்து விடுவர்.இது போன்று காரியம் முடியாத நேரங்களில் தான் பிரச்சனை அம்பலத்திற்கு வருகிற‌து.

இப்பொழுது எதுவும் ஆகாமல் பிரச்சனை அம்பலத்திற்கு வந்துள்ளது.

நமக்கு இப்பொழுது இருக்கும் இன்னொரு கவலை என்னவென்றால் புதிய தலைமுறை கட்டிடமும் அது அமைந்திருக்கும் இடமுமாவது முறைப்படி வாங்கப்பட்டு பதிவு செய்யப்பட்டுள்ளதா.?இல்லை அதிலும் வில்லங்கம் இருக்கிறதா..?

நாட்டில் நடக்கும் சின்ன சின்ன பிரச்சனைகளுக்கு எல்லாம் செய்தி போடும் புதிய தலைமுறை முதலாளி மீதான  500 கோடி ரூபாய் மோசடிக் குற்றச்சாட்டுக்கு செய்தி போடவில்லை.

அவ்வளவு ஏன் இது போன்ற மோசடிகள் வெளிவரும் பொழுது சம்பந்தப்பட்டவர்கள்,ஒப்புக்குச் சப்பாக எங்களுக்கும் முறைகேட்டிற்கும் தொடர்பு இல்லை என்று ஒரு விளக்கெண்ணெய் விளக்கம் தெரிவிப்பார்களே அதைக் கூடத் தெரிவிக்கவில்லை.நம்மிடம் மிகப்பெரிய ஊடக பலம் இருக்கிரது.நம்மை யார் என்ன செய்து விட முடியும் என்ற எண்ணம்.

அதைப் போல பு.த.தொலைக்காட்சி பார்ப்பவர்கள் இது குறித்தெல்லாம் சிந்திக்க மாட்டார்கள் என்று அவர்க‌ளின் விஷய ஞானம்  மீது அவ்வளவு தடித்த நம்பிக்கை....!

ஆனால் அது குறித்த சிறு சலனத்தைக் கூட காட்டாமல் ஊரில் உள்ளவனுக்கு எல்லாம் 24 மணி நேரமும் வீட்டு படுக்கையறை வரை வந்து உபதேசம் செய்து கொண்டிருக்கிறது அதன் ஊடகங்கள்.

என்னத்தச் சொல்ல..

நீ நடத்து பச்சமுத்து .....!

***

புதிய தலைமுறையின் யோக்கியதை இதுவென்றால் புதிய தலைமுறை குழுமம் ஆக்ரமித்த பல கோடி ரூபாய் மதிப்புள்ள அரசு நிலம் குறித்த செய்தியை அதிக 'அக்கறை'யுடன் பெரு மகிழ்ச்சியுடன் வெளியிட்ட மாறன்களின் சன் குழும நெட்வொர்க்கின் அயோக்கியத்தனத்தைப் (லேட்டஸ்ட்)பார்ப்போம்.

தினகரன் நாளிதழின் நேற்றைய (10-07-2013) தலையங்கம் இது.

நீதிமன்றம் பிறப்பிக்கும் உத்தரவுக்கு கட்டுப்பட தவறினால் என்ன ஆகும்? நீதிமன்றத்தை அவமதித்ததாக கருதப்பட்டு சம்பந்தப்பட்ட நபருக்கு தண்டனை விதிக்கப்படும். இது நீதிமன்ற நடைமுறை. நாட்டில் சட்டத்தின் ஆட்சி நடைபெறுகிறது என பொதுமக்கள் மனதில் நம்பிக்கை நீடிக்க வேண்டுமானால், நீதிமன்றங்களின் உத்தரவுகளை தவறாமல் பின்பற்ற வேண்டும் அல்லது நிறைவேற்ற வேண்டும் என்ற சித்தாந்தத்தின் அடிப்படையில் இந்த நடைமுறை நீடித்து வருகிறது. அதாவது,  செல்வாக்கு மற்றும் பின்னணி இல்லாத தனிநபர்களை பொருத்தவரையில். 

ஆட்சி அதிகாரத்தில் இருப்பவர்கள், அதிகாரிகள், அமைப்பு ரீதியான பின்புலம் கொண்டவர்கள் நீதிமன்ற உத்தரவுகளுக்கு கட்டுப்பட வேண்டிய அவசியமில்லை என்ற கருத்து பரவுவதாக தோன்றுகிறது. உச்ச நீதிமன்றத்தில் நேற்று பார்த்தோம். ஒரு இளம்பெண் மீது ஆசிட் ஊற்றி முகத்தை  சீர்குலைத்த சம்பவத்தை விசாரித்த நீதிபதிகள், அரிசி பருப்பு வாங்குவதுபோல கடையில் ஆசிட் சர்வசாதாரணமாக விற்கப்படுவதற்கு முடிவு கட்டுமாறு மத்திய மாநில அரசுகளுக்கு உத்தரவு பிறப்பித்தனர். 
2005ம் ஆண்டில். 

தங்கள் உத்தரவுப்படியே ஆகட்டும் என நீதிமன்றத்தில் உறுதி அளித்த அரசு இத்தனை ஆண்டுகள் கடந்த பிறகும் எந்த ஏற்பாடும் செய்யவில்லை. வரும் 16ம் தேதி வரை கெடு விதித்துள்ள நீதிபதிகள், இந்த கெடுவுக்குள் உரிய நடவடிக்கை களை எடுக்காவிட்டால் நீதிமன்றமே தலையிட்டு தேவையான உத்தரவுகளை பிறப்பிக்கும் என கடுமையாக எச்சரித்துள்ளனர்.

காவிரி நதி நீர் பங்கீடு விவகாரத்தில் கர்நாடக அரசும், முல்லை பெரியாறு அணை பிரச்னையில் கேரள அரசும், தமிழகம் சம்பந்தப்பட்ட பல விஷயங்களில் மத்திய அரசும் உச்ச நீதிமன்றத்தின் உத்தரவுகளை எத்தனை முறை மதித்து நிறைவேற்றியுள்ளன என்பதை எண்ணிப் பார்த்து சொல்ல தேவையில்லை. 
பல வழக்குகளில் தலைமைச் செயலாளரை வரச்சொல், டைரக்டர் ஜெனரல் ஆஃப் போலீஸ் ஆஜராக வேண்டும், உள்துறை செயலாளர் என்ன செய்கிறார் என்றெல்லாம் தார்மீக கோபத்துடன் நீதிமன்றம் வினாக்களை எழுப்பி கண்டிக்கும்போது, சட்டத்தை மதித்து நடக்கும் சாமானிய மக்கள் உடல் சிலிர்த்து மனம் உருகி நீதிதேவதையின் சிலை நிற்கும் திசை நோக்கி கன்னத்தில் போட்டுக் கொள்கிறார்கள். 

அதன் பிறகு என்ன நடக்கிறது?  நீதிமன்ற அவமதிப்பு வழக்குகளின் எண்ணிக்கையில் ஒன்று அதிகரிக்கிறது. வேறெதுவும் நடப்பதில்லை. பத்தாண்டுக்கு முன்பு 500க்குள் இருந்த அவமதிப்பு வழக்குகள் இன்று 2,500 ஆக உயர்ந்துள்ளன. அரசாங்கமே நீதிமன்ற உத்தரவை மதிக்கவில்லை என்பதை பார்க்கும்போது அமைப்பு ரீதியாக வலுவுடன் நடமாடுபவர்களுக்கு அசாத்திய தைரியம் வந்து விடுகிறது. காவல் துறையின் தடையுத்தரவு ஆனாலும் சரி, நீதிமன்ற தடையாணை என்றாலும் சரி, எதற்கும் நாங்கள் கட்டுப்பட முடியாது என்று ஜனநாயகத்துக்கு புது பரிமாணம் சேர்க்க முனைகின்றனர். ‘தடையை மீறி ஆர்ப்பாட்டம்’ என்பதை பகிரங்கமாக அறிவித்துவிட்டே செய்கின்றனர். 

என்.எல்.சி தொழிற்சங்கங்கள் நேரடியாக நீதிமன்றத்தை அணுகி வேலை நிறுத்தத்துக்கு தடையை நீக்கக்கோரின. அந்த கோரிக்கை நிராகரிக்கப்பட்டது. ஆனாலும் சங்க தலைவர்கள் பொருட்படுத்தாமல் தங்கள் ‘ஜனநாயக உரிமையை’ நிலைநாட்டுகின்றனர். மத அமைப்புகளும் ஜாதி அமைப்புகளும் அநேகமாக இந்த வழியைத்தான் பின்பற்றுகின்றன. சாலைகளில் போக்குவரத்து விதிகளை மீறுவது ஆண்மையின் அடையாளம் என பல இளைஞர்கள் நம்புவதை போல, சமூகத்தில் வீரத்தின் வெளிப்பாடாக தங்கள் சட்ட மீறலை சித்தரிக்கும் கட்டாயத்தில் பல தலைவர்கள் கட்டுண்டு கிடக்கிறார்கள். 

நீதிமன்ற உத்தரவை செயல்படுத்துவதில் நடைமுறை சிக்கல்கள் இருக்கின்றன; அவ்வாறு செய்வது புதிய பிரச்னைகளை தோற்றுவிக்கும்; போதுமான ஊழியர்கள் அல்லது எந்திரங்கள் இல்லை என்று ஏதோ ஒரு சாக்கு சொல்லி உள்ளாட்சி அமைப்புகளும் அரசு துறைகளும் கடமையை தட்டிக் கழிக்கின்றன. அதன் மூலம் சட்டத்தின் ஆட்சிக்கு வேட்டு வைக்கின்றன. 

குப்பைகளை அகற்ற வேண்டும், குடிநீர் ஒழுங்காக வினியோகிக்க வேண்டும், பள்ளிகள் நியாயமான கட்டணம் வசூலிக்க வேண்டும், ஆட்டோவில் மீட்டர் போட வேண்டும், ஆக்கிரமிப்பை அகற்ற வேண்டும், கோயில் சொத்துக்களை பாதுகாக்க வேண்டும், விபத்தில் இறந்தவர் குடும்பத்துக்கு இழப்பீடு வழங்க வேண்டும் என்பதை போன்ற இயல்பான  விஷயங்களில்கூட பொதுமக்களுக்கு சாதகமாக நீதிமன்றங்கள் பிறப்பிக்கும் உத்தரவுகள் நிறைவேற்றப்படுவதில்லை.  இதையெல்லாம் நாடு பார்த்துக் கொண்டிருக்கிறது.  

பொதுமக்களின் புலம்பலுக்கெல்லாம் காது கொடுத்துக் கொண்டிருந்தால் வேலையை எப்போது பார்ப்பது என்று அதிகாரிகள் அஞ்சுவதாக தெரிகிறது. அதுதானே அவர்களின் வேலை என்று நீதிமன்றங்களே நினைவுபடுத்தியும் புரிந்துகொள்ளவில்லை என்றால் என்னதான் தீர்வு? நீதிமன்றமே இந்திய மக்களின் இறுதி நம்பிக்கை. அதன் அடித்தளம் பலவீனமாக்கப்பட்டால் இந்த மண்ணில் ஒரு சமூக சுனாமி சுழன்றடிப்பதை யாராலும் தடுத்து நிறுத்த இயலாது.

ஒரு வணிக நோக்கமுடைய‌ செய்தித்தாளில் மிகுந்த அக்கறையுடனும் பொறுப்புணர்வுடனும் அதன் ஆசிரியரால் எழுதப்பட்ட தலையங்கம்.

http://www.dinakaran.com/News_Detail.asp?Nid=55006

நீதிமன்ற‌ங்களின் உத்தரவுகளை அதிகாரத்தில் இருப்பவர்கள்,அதிகாரிகள்,செல்வாக்கு உள்ளவர்கள் யாரும் பின்பற்றுவதில்லை என்றும் அதனைத் தட்டிக் கழிக்க முயற்சிக்கிறார்கள் என்றும்,நீதிமன்றங்களே இறுதி நம்பிக்கை,அதைச் சிதைக்க அனுமதிக்க முடியாது என்றும் ஆதங்கத்துடன் எழுதப்பட்டுள்ளது.

ஆனால் தினகரனின் தலையங்கத்தில் கூறியுள்ளது போல அதிகாரத்தில் இருப்பவர்கள்,விசாரணை அதிகாரிகளின் காலதாமதத்தை உச்ச நீதிமன்றமே சுட்டிக் காட்டி நேற்று (10-07-2013) அதனைக் கண்டன‌ம் செய்துள்ளது.

இது நேற்றும் இன்றும் பெரும்பாலான ஊடகங்களில் அதிக கவனம் ஈர்க்கும் செய்தியாக வந்துள்ள‌து.

(தமிழ்நாட்டில் தினமலர் மட்டும் இச்செய்தியை வெளியிடவில்லை.பொதுவாக மாறன் சகோதரர்களுக்கு எதிரான செய்தியை அதிக முக்கியத்துவம் கொடுத்து பிரசுரித்து மகிழும் தினமலர்,சன் நியூஸ் செய்தி ஆசிரியர் ராஜா மீதான பாலியல் புகார் மற்றும் கைது,நேற்றைய தீர்ப்பு போன்ற‌ இரண்டையும் (திருச்சி தினமலர் தவிர)பிரசுரிக்கவில்லை.களவாணிகளுக்குள் கூட்டு ஏற்பட்டு விட்டது என நினைக்கிறோம்.

அதைப் போல‌ தயாநிதி மாறனுக்கு எதிரான செய்தியை முதல் பக்கத்திலும் ,சிங்கூர் நிலத்தை விவசாயிகளிடம் திருமப ஒப்படைக்க வேண்டும் என்னும் உச்சநீதிமன்ற‌த்தின் உத்தரவை 6 ஆம் பக்கத்திலும் வெளியிட்ட தீக்கதிர்  அரசின் பல கோடி ரூபாய் மதிப்பிலான நிலத்தை ஆக்கிரமித்த எஸ்.ஆர்.எம்.பல்கலைக்கழகம் குறித்த செய்தியை எந்தப் பக்கத்திலும் வெளியிடவில்லை.இப்பொழுது மட்டுமல்ல சமீப வருடங்களில் அப்படித்தான்.

இது தற்செயல் நிக‌ழ்வா..?அல்லது எஸ்.ஆர்.எம்.பல்கலைக்கழகத்தின் லட்சங்கள் பெறுமானமுள்ள விளம்பரத்தை வாங்கும் 'ராஜதந்திரமா'அல்லது புதிய தலைமுறை தொலைக்காட்சி சார்பிலான பல்வேறு நிகழ்ச்சிகளில் தீக்கதிரின் ஆசிரியர் குமரேசன் கலந்து கொண்டு தனது அரிய கருத்துக்களை எடுத்து வைப்பதற்கு அளிக்கப்படும் வாய்ப்பிற்கான 'கைம்மாறா' என்று நீங்களே முடிவு செய்து கொள்ளுங்கள்.)


குறிப்பாகச் சொல்லப் போனால் காலையில் தினகரன் எழுதிய தலையங்கத்திற்கு ஏற்ற தொனியில் மதியம் உச்சநீதிமன்றம் தீர்ப்பளித்துள்ளது.இது உள்ளபடியே தினகரனும் சன் டி.வி.யும் மகிழ வேண்டிய நிகழ்வு.

இதே போன்ற நிகழ்வு ஜுனியர் விகடன்,நக்கீரன்,ரிப்போர்ட்டர் போன்ற‌ புளுகித் திரியும் இதழ்கள் கையில் கிடைத்திருந்தால் நாங்கள் சொன்ன படி தான் உச்சநீதிமன்ற‌ம் தீர்ப்பளித்துள்ளது.நீதியரசர்களுக்கு நன்றி என்று தங்களைத் தாங்களே மெச்சிக் கொண்டு க‌வர் ஸ்டோரி வைத்திருப்பார்கள்.

ஆனால் நேற்றைய உச்சநீதிமன்ற‌த் தீர்ப்பை,தினகரன் ஒரு வரி கூட பிரசுரிக்கவில்லை.எழுதிய தலையங்கத்தின் மை ஈரம் கூடக் காயவில்லை.ஆனால் அதற்கு நேர்மையாய் நடக்க முயற்சிக்கவில்லை.தங்களுக்கு எதிரான செய்தி என்பதால் அப்படி ஒன்று நாட்டில் நடக்காதது போல இருக்கிற‌து.

கலாநிதி மாறன்

இந்த தினகரன் தான் புதிய தலைமுறை குழுமத்தின் 500 கோடி மதிப்புள்ள அரசு இடம் ஆக்கிரமித்த மோசடியை வெளியிடுகிறது.அதைக் கண்டு ஆத்திரமுற்ற புதிய தலைமுறையோ பதிலுக்கு மாறன்களுக்கு எதிரான செய்தியை  முக்கியத்துவம் கொடுத்து அதிக நேரம் ஒளிபரப்பி மகிழ்ச்சி அடைகிறது.

அனைத்து விஷயங்களிலும் மாறன்களுக்கு சற்றும் சளைத்தவரல்ல பச்சமுத்து.இதில் யாரை யார் முந்துவது என்னும் போட்டி தான் இங்கு நடக்கிற‌து.அதன் விளைவு தான் இருவரும் அடுத்தவர் குறித்த செய்திகளை போட்டி போட்டுக் கொண்டு வெளியிடுகிறார்கள்.தினமலருக்கும் மாறன்களுக்கும் இப்பொழுது அண்டர்ஸ்டாண்டிங் ஏற்பட்டுள்ள‌தைப் போல இவர்கள் இருவருக்கும் ஏற்பட்டு விட்டால் அதன் பின் இப்பொழுது தப்பித் தவறி வெளிவரும் ஒன்றிரண்டு 'உண்மை'களுக்கும் சமாதி தான்.

ஆனால் இவர்கள் நடத்தும் தொலைக்காட்சிகள் மற்றும் செய்தித் தாள்களில் நடத்தும் சில விவாதஙகளும் எழுதும் தலையங்கங்களும் உண்மையான மாற்று இதழ்களில் கூடக் காணக் கிடைக்காது.ஆனால் இவர்களின் 'வளர்ச்சி'க்குப் பின்னுள்ள உண்மைகள் முடை நாற்றம் எடுத்துக் கிடக்கின்றன.

ஆனால் பொது சமூகமோ இந்த 'யோக்கியர்கள்' உண்மையைச் சொல்வார்கள் என்று தொலைக்காட்சி மற்றும் செய்தித்தாளில் முன் எதிர்பார்த்துக் கிடக்கிற‌து.

ஆனால் மலத்தில் அரிசி பொறுக்குவதை விட கொடுமையானது இவர்களிடம் இருந்து நடுநிலையையும் உண்மையையும் எதிர்பார்ப்பது என்பது ஒரு நாள் தெரிய வரும்.

வேந்தர் டிவி ஜூலை 15 இல் ஒளிபரப்பு தொடக்கம்...?

பச்சமுத்து 

தங்களுக்கு ஏற்றவாறு உண்மைச் செய்திகளை உடனுக்குடன் ஒளிபரப்பி வரும் புதிய தலைமுறை தொலைக்காட்சி குழுமத்தில் இருந்து வேந்தர் தொலைக்காட்சி என்ற பெயரில் புதிய தொலைக்காட்சி வெளிவருவது தெரிந்த செய்தி தான்.

பலமுறை திட்டமிட்டுத் தள்ளிப் போன அதன் ஒளிபரப்பு வரும் ஜூலை 15 முதல் ஒளிபரப்பைத் துவங்குவதாகத் தெரிகிறது.இதுவும் உறுதியா என்று தெரியவில்லை.

இதனை நாம் சொல்லவில்லை.

புதிய தலைமுறை அதிபரும்,பல்லாயிரம் கோடிரூபாயைப் பதுக்கி வைத்துக் கொண்டு ஊழலையும் வறுமையையும் அறவே ஒழிக்கப் புறப்பட்டிருக்கும் பச்சமுத்துவின் தொண்டர்கள் தான் சொல்கின்றனர்.

கருப்புப் பணத்துக்கும் எங்களுக்கும் சம்பந்தம் இல்லைன்னு ஒப்பிக்கிறாங்க..ஆனா எங்களுக்கும் டிவிக்கும் சம்பந்தம் இல்லைன்னோ, காலேஜூக்கும் எங்களுக்கும் சம்பந்தம் இல்லை,ஆகவே அரசே ஏற்று நடத்தலாம் என்றோ சொல்ல மாட்டிக்கிறாங்க...

எப்படி இருந்தாலும் வேந்தரின் ஆரம்பமே 'அமர்க்களமாக' இருக்குது.

உங்களிடம் இருந்து கலகக்குரலுக்கு நிறைய எதிர்பாக்கிறோம்.

புதிய வரவுக்கு 'வாழ்த்துக்கள்'.....

பாரதிராஜா ஏந்தி வரும் விகடன் வீச்சரிவாள்....!

ZEE தமிழ் தொலைக்காட்சியின் சொல்லுவதெல்லாம் உண்மை நிகழ்ச்சி.

கருத்து வேறுபாட்டாலும் இதரக் காரணங்களாலும் பிரிந்த குடும்பங்களை,கணவன் மனைவியை தங்களது ஆலோசனை மற்றும் அறிவுரை மூலம் மீண்டும் வாழ்வில் இணைத்து வைப்பதாகச் சொல்லுவது தான் இந்த நிகழ்ச்சி.

அந்த நிகழ்ச்சியில் ஒரு நாளில் ஒளிபரப்பான நிகழ்ச்சியில் ஒரு காட்சி..

வழக்கம் போல் கணவன் மனைவி பஞ்சாயத்து

மனைவி தனது கணவன் குறித்து ஒரு குற்ற‌ச்சாட்டைச் சொல்லுகிறார்.வழக்கம் போல் பாலியல் குற்ற‌ச்சாட்டு.

நிகழ்ச்சி ஒருங்கிணைப்பாளர் லட்சுமி ராமகிருஷ்ணனைத் தவிர அரங்கத்தில் யாருமில்லை.

மனைவியின் குற்ற‌ச்சாட்டு கடுமையாகிக் கொண்டிருக்க...திடீரென்று அரங்கில் கணவன் ஆவேசமாய் நுழைகின்றான்.

அவன் கையில் செருப்பு.அதனை எடுத்துக் கொண்டு மனைவியை நோக்கி அடிக்க ஓடுகிறான்.

கணவன் செருப்பால் மனைவியை அடிக்கப் போகிறான் என்று பதட்டத்திலும் பரிதவிப்பிலும் பார்வையாளன் அமர்ந்திருக்கும் இருக்கையின் நுனிக்குச் செல்கிறான்.

அடிக்கப் போவதைத் த்டுக்க முடியவில்லையே என்று பச்சாதபத்தில் இருக்கிறான்.

அடிக்கப் போவது பார்வையாளனுக்கு முன் கூட்டியே தெரிவதைப் போல கண்டிப்பாய் அரங்கில் இருப்பவர்களுக்கும் தெரிந்திருக்கும்.

உண்மையான சமூக அக்கறை உள்ளவர்கள் என்றால் என்ன செய்வார்கள்..?கணவனைத் தடுப்பார்கள்.மனைவியைப் பாதுகாப்பார்கள்.

ஆனால் இங்கோ தொலைக்காட்சி காமரா,கண‌வன் கையில் ஏந்தியிருக்கும்  செருப்பை பாலோ செய்கிறது.கணவன் கையில் இருக்கும் செருப்பை காம‌ரா zoom செய்கிறது.கண‌வன் மனைவியை செருப்பால் அடித்து துவைக்கிறான்.செருப்பினால் அடிக்கும் பொழுது பல கோண‌த்தில் பதிவு செய்கிறார்கள்.

என்னே 'சமூக அக்கறை'.....!

கணவன்-மனைவியைச் செருப்பினால் அடித்து ஓய்ந்தவுடன் எங்கிருந்தோ அரங்கில் நுழையும் ஆசாமிகள் கணவனைத் தடுக்கிறார்கள்.

ஆக ஆள் இல்லாமல் தடுக்காமல் இருக்கவில்லை.

அடிக்கப் போவது தெரிந்திருக்கிற‌து.அதனால் தான் செருப்பினை zoom  செய்கிறார்கள்.

கணவனைத் தடுக்கப் போதிய பல‌ம் இல்லாமல் இல்லை.ஆனாலும் அடிக்கும் வரை காத்திருந்து,அடித்து முடிந்தவுடன் உள்ளே நுழைந்து காப்பாற்றுகிறார்கள்.

இது தான் சொல்லுவதெல்லாம் உண்மை நிகழ்ச்சி.இதற்குப் பின்னால் பிரிந்திருக்கும் குடும்பத்தை இணைக்கும் சமூக அக்கறை இருக்கிற‌தாம்.அதனால் அனைத்தையும் ஒளிபரப்பி சமூகத்தின் பார்வைக்கு வைக்கிறார்களாம்.

நிகழ்ச்சியைப் பார்க்கும் நமக்குக் காறித் துப்ப வேண்டும் போல் இருக்கிற‌து.

ZEE தமிழ் தொலைக்காட்சி தமிழ்ச் சமூகத்தை இப்படிக் கெடுத்துக் கொண்டிருக்க அதன் பங்குக்குச் சற்றும் குறையாமல் ஒரு பதிவு 'பாரம்பரியமிக்க' ஆனந்த விகடனில் வெளிவந்திருக்கிறது.

முழுக்க முழுக்க கேவலமாக திட்டமிட்டு நடத்தப்ப‌டும் சொல்லுவதெல்லாம் உண்மை நிகழ்ச்சியையும்,ஓரளவு சிற‌ப்புடன் வெளிவரும் கேள்வி பதில் பகுதியையும் துளியும் ஒப்பிட முடியாது என்றாலும் மணிவண்ணன் குறித்த பாரதிராஜாவின் பதில் பகுதியைப் படித்த நம்மால் அந்தப் பதிலையும் சொல்லுவதெல்லாம் உண்மை நிகழ்ச்சியுடன் ஒப்பிடுவதைத் தவிர்க்க முடியவில்லை.

ஆ.விகடன் வாசகர்களின் கேள்விகளுக்கு பல ஆளுமைகள் பதில் சொல்லிக் கொண்டிருக்கிறார்கள்.இதுவரை ஓய்வு பெற்ற நீதியரசர் சந்துரு,கூடங்குளம் அணு உலை உலை எதிர்ப்பு போராட்டக்குழு ஒருங்கிணைப்பாளர் உதயகுமார் உட்பட பல பிரபல்யங்கள் தங்கள் அனுபவங்களை,சந்தித்த மனிதர்களை,கருத்துக்களை வாசகர்களின் கேள்விகள் வழியாகப் பகிர்ந்து கொள்கின்றனர்.(சு.சாமியும் இதில் பங்கெடுத்திருக்கிறார்)

இந்தப் பகுதி குறித்து இதுவரை கடுமையான விமர்சனங்கள் வந்தது இல்லை.

இரண்டு வாரங்களாகத் திரைப்பட இயக்குனர் பாரதிராஜா பதிலளித்துக் கொண்டிருக்கிறார்.பதில்கள் பெரும்பாலும் ஆணவத்துடனும் அகம்பாவத்துடனும் வந்து கொண்டிருக்கின்றன.

பொதுவாக ஆனந்த விகடன் உட்பட சில பத்திரிகைகளில் வெளிவரும்,நானே கேள்வி-நானே பதில்,வாசகர் கடிதம்,மற்றும் வாசகர்கள் கேள்விகள் போன்றவை மாதிரியான பகுதிகள் அனைத்தும் முழுக்க முழுக்க வாசகர்கள் பங்களிப்புடன் வருபவை அல்ல.

சில உண்மையாகவே வாசகர்களிடமிருந்தும்,சில சமூக அக்கறையுடன் டெஸ்க்கில் நிருபர்களால் உருவாக்கப்ப‌ட்டும்,சில உள்நோக்கத்துடன் திட்டமிட்டும், சில பக்கங்களை நிரப்புவதற்கும் உருவாக்கப்ப‌டுபவை தான்.

பாரதிராஜாவிடம் கேட்கப்பட்ட சில கேள்விகள் பாரதிராஜாவுக்காக திட்டமிட்டு உருவாக்கப்பட்டவை என்னும் தோற்றத்தில் இருக்கின்றன.அதில் ஒன்று தான் மணிவண்ணன் குறித்துக் கேட்கப்ப‌ட்ட கேள்வியும்.

மணிவண்ணன் எப்பொழுதும் உங்களைக் கடுமையாய் விமர்சிக்கிறாரே என்பது கேள்வி.(19-06-2013 தேதியிட்ட‌ இதழ்)

(சிதம்பரத்தைச் சேர்ந்த எஸ்.குரு என்பவரின் பெயரில் இந்தக் கேள்வி வந்துள்ளது.கேள்வி கேட்ட குரு பாத்திரம் யார் என்பது ஆ.வி.சினிமா ரிப்போர்ட்டர் திருவாரூர் குணாவுக்கே வெளிச்சம்.)

இதற்கு பாரதிராஜாவின் பதில்....

இங்கே ஒரு ஃப்ளாஷ்பேக் கட் பண்றேன்... என் முதலாளி கே.ஆர்.ஜி-யும் 
நானும் வேலை விஷயமாக அடிக்கடி ஒரு ஆபீஸுக்குப் போவோம். அங்கே அக்கவுன்ட் 
செக்ஷன்ல வேலை பார்க்கிற ஒரு ஆள் என்னைப் பார்க் கிறப்பலாம் எந்திரிச்சு 
வணக்கம் வைப்பான். நான் அதை ஆச்சர்யமா பார்க்கிறப்ப, 'பாரதி... உன் மேல 
அவன் ரொம்பப் பிரியமா இருக்காம்பா... அதான் வணக்கம் வைக்கிறான்’னு 
சொல்வார் கே.ஆர்.ஜி. 

கொஞ்ச நாளுக்கு அப்புறம் பார்த்தா, அந்த ஆள் யோகாம்பாள் தெருவில் நான் 
குடியிருந்த வாடகை வீட்டு வாசலுக்கு வந்து தினமும் நிக்க 
ஆரம்பிச்சுட்டான். வீட்டு வாசல்ல என்னைப் பார்க்கிறப்பலாம் வணக்கம் 
வைப்பான். இப்படியே ஒரு 15 நாள் போச்சு. ஒரு நாள் அவனை அழைச்சுட்டு வரச் 
சொன்னேன். வந்து உக்காந்தவனுக்கு உயிர் கண்ணுல இருந்தது. எதுவும் கேக்காம 
அவனுக் குக் குடிக்கத் தண்ணியும் கொஞ்சம் டீயும் கொடுக்கச் சொன்னேன். 
குடிச்சான். அவனுக் குள்ள ஏதோ ஒரு திறமை இருக்குன்னு எனக்குள்ள தோணுச்சு. 
'கல்லுக்குள் ஈரம்’ படத்தில் அவனை வேலை பார்க்கச் சொன்னேன். அப்போ 
என்கிட்ட இருந்த பலர், 'அவன் மூஞ்சியே சரியில்லையே’னு சொல்வாங்க. 
'போங்கடா... அவன் திறமைசாலிடா’னு 'நிழல்கள்’ படத்துல வசனம் எழுதும் 
பொறுப்பை அவனுக்குக் கொடுத்து, நடிக்கவும்வெச்சேன். அவன்தான் மணிவண்ணன். 

“மணிவண்ணனுக்குக் கல்யாணம் நடந்த கதை தெரியுமா? என் அம்மாவுக்குத் தெரிஞ்ச ஒரு பெண், மயிலாப்பூர்ல என் நண்பர் ஆறுமுகத்தின் வீட்டில் அவருடைய பாதுகாப்பில், என் கண்காணிப்பில் இருந்துச்சு. அந்தப் பெண்ணுக்கு நானும் ஆறுமுகமும் அவருடைய பிராமண சமூகத்தில் மாப்பிள்ளை தேடிட்டு இருந்தோம்.

ஒரு முறை மணிவண்ணனையும் அழைச்சுட்டு அந்த மயிலாப்பூர் வீட்டுக்குப் போயிட்டு கார்ல திரும்பிட்டு இருந்தோம். அப்போ அந்தப் பொண்ணுக்கு மாப்பிள்ளை தேடும் விஷயமாப் பேசிட்டே வந்தோம். அப்போ எங்க பேச்சுக்கு இடையில் குறுக்கிட்ட மணிவண்ணன், ‘அந்தப் பெண்ணை நானே கல்யாணம் பண்ணிக்கிறேனே’னு சட்டுனு கேட்டுட்டான்.

அப்போதைக்கு நான் எதுவும் சொல்லாம, என் மனைவிகிட்ட இது சம்பந்தமா பேசினேன். ‘ஒரு வருஷம் போகட்டுங்க. அப்பவும் அவர் இதே பிடிவாதத்தோட இருந்தா… அவருக்கே அந்தப் பெண்ணைக் கட்டிவெச்சுடலாம்’னு அவங்க சொன்னாங்க. ஒரு வருஷம் போனது. ‘மணிவண்ணன் அந்தப் பொண்ணு ஞாபகமாவே இருக்கான். பேசாம கட்டி வெச்சிடுங்க’னு சித்ரா லட்சுமணன் என்கிட்ட வந்து சொன்னான்.

‘சரி’ன்னு முடிவெடுத்து, அந்தப் பொண்ணுக்கு என் கைக்காசுல இருந்து பத்து பவுன் நகை போட்டு, அந்தப் பெண்ணுக்கும் மணிவண்ணனுக்கும் கல்யாணம் பண்ணிவெச்சேன். அப்புறம் ‘காதல் ஓவியம்’ படத்தின் வசனத்தை அவனை எழுதச் சொன்னேன். அந்தப் படத்தின் டப்பிங் வேலை நடந்துட்டு இருக்கும்போது அதுல கலந்துக்காம, என்னைத்தேடி வீட்டுக்கு வந்தான் மணிவண்ணன்.

‘நான் தனியாப் படம் டைரக்‌ஷன் பண்ணப்போறேன்’னு சொன்னான். உடனே, மனசார ஆசீர்வாதம் பண்ணி அனுப்பிவெச்சேன்.

மணிவண்ணன் நல்ல படிப்பாளி, சிறந்த அறிவாளி. என்ன ஒண்ணு… வாயைத் திறந்தா, எல்லாமே பொய் பொய்யாத்தான் கொட்டும்.

ஒரு ராஜா கதை இருக்குமே… வீதில கஷ்டப்பட்டுட்டு இருந்த ஒரு பிச்சைக்காரனை அரண்மனைல தங்கவெச்சான் அந்த ராஜா. ஆனா, அரண்மனையின் நளபாகவிருந்து அந்தப் பிச்சைக்காரனுக்கு அலர்ஜி ஆகிடுச்சு. ‘இவன் பிச்சை எடுத்த தெருவுல இருக்குற பத்து வீடுகள்ல இருந்து சோறு வாங்கிட்டு வந்து இவனுக்குப் போடுங்க’னு சொன்னார் ராஜா. அப்படியே செஞ்சாங்க… பிச்சைக்காரனுக்கு உடம்பு சரியாப்போச்சு. அப்பிடி, மணிவண்ணனை அரண்மனைக்கு அழைச்சுட்டு வந்தது என் தப்புதான்!”

இந்தப் பதிலைப் படித்தால் ஒவ்வொரு வரியும் ஒரு குடிகாரனின் போக்கிரித்தனமான உளறல் போலத் தான் தோன்றுகிற‌து.ஒரு மூத்த படைப்பாளியின் பொறுப்பான பதில் போலத் தோன்றவில்லை.பாரதிராஜா கையாண்ட மொழி நடை உட்பட அனைத்தும் அப்படித்தான் இருக்கின்ற‌ன.

இதில் உச்சகட்ட கேவலமான அவதூறு என்ன தெரியுமா..?

“மணிவண்ணனுக்குக் கல்யாணம் நடந்த கதை தெரியுமா? என் அம்மாவுக்குத் தெரிஞ்ச ஒரு பெண், மயிலாப்பூர்ல என் நண்பர் ஆறுமுகத்தின் வீட்டில் அவருடைய பாதுகாப்பில், என் கண்காணிப்பில் இருந்துச்சு. //

பாரதிராஜா நடந்ததாகச் சொல்லும் இந்தச் சம்பவம்,ஏற‌த்தாழ 30 வருடங்களுக்கு முன்பு.பாரதிராஜாவுக்கு அப்பொழுது தோராயமாக வயது 35 முதல் 40 வரை இருக்கலாம் .

பாரதிராஜா போன்ற தனிப்பட்ட வாழ்க்கையில் 'தரமற்ற‌' ஒருவர் என் கண்காணிப்பில் அந்தப் பொண்ணு இருந்துச்சு என்று சொல்வது,படிப்பவர்களுக்கு எவ்வளவு தவறான பார்வையைத் த‌ரும் என்பது திரைத்துறையுடன் தொடர்புடையவர்களுக்குத் தெரியும்.மணிவண்ண‌னை மட்டுமல்ல அந்தப் பெண்ணையும் மிக மோசமாக பாரதிராஜாவின் பதில் இழிவு படுத்துகிறது.

இப்படி நாலாந்தர கழிசடைத்தனமான வார்த்தைகளுடன் பாரதிராஜா பதில் சொல்லியிருக்கிறார்.பாரதிராஜாவின் வார்த்தைகளில் எவ்வளவு வன்மம்.மிக இழிவான தனிப்பட்ட அவதூறு.

பாரதிராஜா என்பவரை ஒரு ஆளுமையாகக் கருதி அவரது அனுபவங்களை,எண்னங்களைப் பதில்களாக்கி விகடன் வாங்கி வெளியிட்டால் அவர் தான் யார் எனத் தனது பதில்களின் மூலம் நிருபித்திருக்கிறார்.

இதில் பாரதிராஜாவை மட்டும்  நாம் குற்ற‌ம் சாட்ட முடியாது.இதனை வெளியிட்ட  ஆனந்த விகடன் தான் அதிகம் குற்ற‌ம் சாட்டப்பட வேண்டிய இதழ்.

பாரதிராஜாவின் அனைத்து உளறல்களுக்கும் ஆ.விகடன் எதற்கு இடம் கொடுக்க வேண்டும்..? அவர் வாந்தி எடுத்தையெல்லாம் தணிக்கை செய்யாமல்வாசகனுக்குப் பரிமாற வேண்டும் என்ற அவசியம் விகடனுக்கு எதற்கு..?

இதே பாரதிராஜா,நாளை ரஜினிகாந்த் குறித்தும் கமலஹாசன் குறித்தும் எதை எழுதினாலும் அதனை ஆனந்த விகடன் தணிக்கையின்றி வெளியிடுமா..? அதற்குத் துணிவு இருக்கிற‌தா..?

இவ்வளவு ஏன் இந்த வாரம் ஒரு கேள்வி- பதிலில் விஜயகாந்த் குறித்தும்,சீமான் குறித்தும் பாரதிராஜா குற்றம் சாட்டியிருக்கிறார்.ஆனால் அவர்களது பெயரைக் கவனமாகக் கத்தரி போட்டு விட்டதே..?

ஏன் மணிவண்னன் பின்பு கோஷம் போடவும், கொடி பிடிக்கவும், விகடன் அலுவலகத்திற்கு போன் செய்து திட்டவும் நான்கு பேர் இல்லை என்பதாலா..?

பாரதிராஜா குறித்து உண்மையாகவும் நேர்மையாகவும் விமர்சிக்க எத்தனையோ துணை,இளம் இயக்குனர்கள் இருக்கிறார்கள்.அவர்களைப் பேட்டி கண்டு அப்படியே வெளியிட விகடனுக்குத் துணிச்சல் உண்டா..?

துணிந்து சொல்லலாம் விகடனுக்குத் துணிவிருக்காது என்று.

இந்த லட்சணத்தில் மணிவண்ண‌ன் இறந்த பின்பு அவரைப் புகழ்ந்து இந்த இதழில் (26-06-2013 தேதியிட்ட இதழ்) 2 பக்க மேட்டர் .அதற்கு சத்யராஜ் பங்களிப்பு செய்திருக்கிறார்.பாரதிராஜாவின் கேவலமான ப்தில் மணிவண்ணனை உளவியல் ரீதியில் நெருக்கடிக்கு கொண்டு சென்றிருக்கிறது.அவர் இறந்த பின்பாவது,அதற்கு போகிற போக்கில் ஒரு வருத்த‌ம் கூடத் தெரிவிக்காமல் பாராட்டு கட்டுரை இரண்டு பக்கம்.

(பாரதிராஜாவின் சாக்கடை பதில்,இரு நாட்களில் மணிவண்ண‌ன் மரணம்,என நிகழ்ந்ததனால் இந்த விஷயத்தில் ஆ.வி.அடுத்த இதழில் எதும் துளி வருத்தமாவது வெளியிடுமோ என்று எதிர்பார்த்தோம்.அதனால் தான் தாமதமான இந்தப் பதிவு)

சொல்லுவதெல்லாம் உண்மை நிகழ்ச்சியில் உலகமறிய கணவனிடம் செருப்பால் அடிவாங்கிய அந்த பரிதாபத்திற்குரிய பெண் இன்று எங்கிருக்கிறார் என்று நமக்குத் தெரியாது.ஒருவேளை கணவணே கண் கண்ட தெய்வம் என்று அவனுடன் வேறு வழியின்றி இணைந்து வாழ்ந்து கொன்டிருக்கலாம்.அல்லது உயிருடன் அனுதினமும் செத்துக் கொண்டிருக்கலாம்.அல்லது அவனுடன் வாழ்வதை விடச் சாவதே மேல் என முடிவெடுத்திருக்கலாம்.அல்லது கணவனைத் தூக்கி எறிந்து விட்டு மானத்துடன் வாழ்ந்து கொண்டிருக்கலாம்..

ஆனால் பாரதிராஜா ஆனந்த விகடன் இதழ் பதில் மூலம் மணிவண்னனை நோக்கி வீசிய அவதூறு மற்றும் தரம் தாழ்ந்த விமர்சனம் என்னும் வீச்சரிவாள் அவரைப் பதம் பார்த்து விட்டது.தடுக்க வேண்டிய ஆனந்த விகடனோ எதுவும் செய்யாமல் பாரதிராஜா என்னும் 'ஆளுமை'யைப் பிரமிப்பாகப் பார்த்துக் கொண்டிருக்கிறது.

பழமொழி ஒன்று நினைவுக்கு வருகிற‌து.

சொல்லாத சொல்லுக்கு நீ எஜமான்..
சொன்ன சொல்லோ உனக்கு எஜமான்...

பாரதிராஜா போன்ற நபர்கள் கண்டிப்பாய் இந்தப் பழமொழியைக் கடைப்பிடிக்க என்றும் வாய்ப்பு இல்லை.

நாம் ஆனந்த விகடன் இதழைக் காசு கொடுத்து வாங்கிப் படிக்கிறோம்.அதனால் ஆ.விகடன் கடைப்பிடிக்க வேண்டிய சமூகப் பொறுப்புணர்வும் கடமையும்  இருக்கிறது.

புதிய தலைமுறை-கருப்புப் பணத்தில் மறைக்கப்பட்ட ஊரறிந்த‌ உண்மை..!

ஜி 8 கூட்டத்தில் கருப்பு பணம் குறித்த விவாதம்-வரி ஏய்ப்பைத் தடுக்க நாடுகள் உறுதி

நிலக்கரி சுரங்க ஒதுக்கீடு விவகாரம்-காசியாபாத் பகுதிகளில் சிபிஐ சோதனை.

ஆயிரம் ரூபாய் லஞ்சம் வாங்கிய தாசில்தார் கைது..

சுகாதார ஆய்வாளர் மீது  லஞ்சப் புகார் 

என உலக அளவில் இருந்து உள்ளூர் முறைகேடு வரை விலாவாரியாகச்  நேற்று செய்தி வெளியிட்ட புதிய தலைமுறை தொலைக்காட்சி, தனது தொலைக்காட்சி அலுவலகம் மற்றும் கல்வி நிறுவனங்கள் அனைத்திலும் கல்வி முறைகேடு தொடர்பாகவும் அதில் நன்கொடை என்ற பெயரில் பெற்ற கணக்கு வழக்கற்ற‌ பணம் தொடர்பாகவும், திரைப்படத் தயாரிப்பில் முதலீடு செய்யப்பட்ட‌ கருப்புப் பண பரிவர்த்தனைகள் தொடர்பாகவும் வருமானவரித்துறையினர்  நேற்று (18--06-2013)நடத்திய சோதனை மற்றும் விசாரணை குறித்து நேற்று காலையில் வெளியிட்ட ஒருவரிச் செய்தியுடன் சில நிமிடங்களில் நிறுத்திக் கொண்டது.

'புயலைத் தொடரும் புதிய தலைமுறை' என்ற தலைப்பில் நீலம் புயல் குறித்து, புயல் அங்கு கரையைக் கடக்கிறது,அங்கே பலத்த சேதம்,இங்கு பெரும் பாதிப்பு என பல பரிமாணத்தில் சில மாதங்களுக்கு முன்பு செய்தி வழங்கிய பு.த.தொ.,தனது அலுவலகம் மற்றும் சகோதர குழுமங்களில் நடந்த சோதனை குறித்து ஒரு பதிவும் செய்யவில்லை.

அதிகம் கூடச் சிரமப்பட்டிருக்க வேண்டாம்.

ஹெலிகாப்டரை வாடகைக்கு எடுத்து புயல் சீற்றத்தை விலாவாரியாக ஒளிபரப்பியவர்கள் தனது தொலைக்காட்சி அலுவலகத்தில் நடந்த சோதனையை பைசா செலவில்லாமல் விலாவாரியாக காட்டியிருக்கலாம்.
250 ந்பர்கள் பல்வேறு குழுக்களாகப் பிரிந்து நடத்திய சோதனையை அமைதியாக ஒன்றுமே நடக்காதது போலக் கடந்து சென்றார்கள்.

6.75 கோடிப் பணத்தை  எஸ்.ஆர்.எம்.குழுமத்தில் இருந்து கைப்பற்றினோம் என்று வருமான வரித்துறை காலையில் வெளியிட்ட  அறிக்கையை வெளியிடாத பு.த.தொ., அதற்கு எஸ்.ஆர்.எம்.குழுமத்தின் மறுப்பையும் இணைத்து நேற்று (19-06-2013)இரவில் இருந்து ஒளிபரப்பிக் கொண்டு இருக்கிறது.

'உண்மை உடனுக்குடன்' என்பது ஊருக்கு மட்டும் தான் என்பது நாம் அறிந்த செய்தி தானே..!

மாணவர்களிடமிருந்து நன்கொடை என்ற பெயரில் ரத்தத்தை உறிஞ்சிய பணத்தில் உருவான புதிய தலைமுறை தொலைக்காட்சி இப்படி நடந்து கொள்ளும் என எதிர்பார்த்தது தான்.நாம் ஆரம்பம் முதலே இதனைப் பலமுறை சுட்டிக் காட்டியிருக்கிறோம்.

இதில் புதிதாய் ஒன்றுமில்லை.நேற்றும் இன்றும் நடைபெற்ற வருமானவரிச் சோதனைகளின் விசாரணை இறுதிவரை உண்மையாகவும் சரியான திசையில் சென்றால் பு.த. நிறுவனமே கருப்புப் பணத்திலும் முறைகேட்டிலும் சம்பாதித்த பணத்தில் நடைபெறுவது தான் என்று உறுதிப்படுத்தப்படும்.

அப்படி எல்லாம் நடைபெற்றுவிடுமா என்ன.?

இந்தச் சோதனையை ஊத்தி மூட இனி  என்ன சமரசங்கள் நடைபெறுமோ அது பகிரங்கமாக நடைபெறாது.ஆனால் ஊத்தி மூடப்படும் என்பது உறுதி.

ஈழத் தமிழர்களுக்கு ஆதரவாய்ச் செய்திகளை வெளியிட்டமையால் காங்கிரஸ் முன்னாள் அமைச்சர் இளங்கோவன் எங்களை மிரட்டுகிறார் என்று,சில மாதங்களுக்கு முன்பு 'புரட்சி' முகம் காட்டி வாசகர்களைப் பரவசப்படுத்திய ,அவர்களின் உரோமம் துடிக்கும் அளவுக்கு ஆதரித்து இணையத்தில் எழுதச் செய்த புதிய தலைமுறை தொலைக்காட்சி இந்த முறை அப்படி 'புரட்சி' அரிதாரம் பூசாது.

குறைந்த பட்சம் புதுப்புதுஅர்த்தங்கள் அல்லது நேர்படப் பேசு போன்ற நிகழ்ச்சியிலாவது வருமான வரித்துறையின் 'அத்துமீறல்' குறித்து போகிற போக்கில் ஒற்றை வரி கூடப் பேசவில்லை.

இப்பொழுது அப்படி 'புரட்சி' வேடம் கட்டினால் மக்களிடம் அது எடுபடாது என்பதைத் தாண்டி,அது பிரச்சனையை இன்னும் சிக்கலாக்கி அட்மிஷன் கொள்ளையை மட்டுமல்ல,திரைப்படத் தயாரிப்பு உட்பட இருக்கும் அனைத்துப் பிழைப்பையும்  கெடுத்து விடும் என்பது நன்கு தெரியும். ஆகவே அமைதியாய் 'காரியம்' சாதிக்க எண்ணுகிறது.

ஏனென்றால் எப்பொழுது எதைச் செய்ய வேண்டும்..?

எப்பொழுது எதைச் செய்தால் வெற்றி கிட்டும் என்பது  கொள்கைவாதிகளைக் காட்டிலும் பிழைப்புவாதிகளுக்கு நன்கு தெரியும்.

தொடர்புடைய இணைப்புக்கள்

http://www.vinavu.com/2012/08/30/puthiya-thalaimurai/

http://www.vinavu.com/2012/08/24/bday-wishes-pachamuthu/

http://kalakakkural.blogspot.in/2012/07/blog-post_17.html

http://kalakakkural.blogspot.in/2012/07/blog-post_22.html

http://www.dinakaran.com/News_Detail.asp?nid=52789

இந்தியா டுடே ஆசிரியர் ரேஸில் 3 பேர்...!

'இந்தியா டுடே'வின் தமிழ்ப் பதிப்புக்கு ஆனந்த் நடராஜன் என்பவர்தான், பல ஆண்டுகளாக ஆசிரியராக இருந்து வந்தார். அண்மையில் அவர் வேலையில் இருந்து விலகியதால், அந்த இடத்திற்கு ஆள் எடுக்கும் பணி தீவிரமாக நடைபெற்று வருகிறது.

சில மாதங்களுக்கு முன்பே நடராஜன் விலகல் கடிதம் அளித்ததாகவும் அடுத்தவர் வரும்வரை பணியில் நீடிக்குமாறும் நிர்வாகம் கேட்டுக்கொண்டதாகவும் தகவல்.

இதையொட்டி, தமிழின் முக்கிய செய்தி இதழுக்கு ஆசிரியர் பணிக்காக, பல தரப்பிலும் ஆள்தேடல் நடந்திருக்கிறது. ஆனால், தமிழ் ஊடகத்துறையின் சோகமா(!), ஊடக முதலாளிகள் செய்யும் அக்கிரமமா தெரியவில்லை, இந்த செய்தி இதழுக்கு ஏற்ற ஆசிரியர் கிடைக்கவில்லையாம். ஆனந்த் நடராஜன் விலகியபின்பு யாரையாவது அந்த இடத்துக்கு வேறு வழியின்றி, அமர்த்தித்தானே ஆகவேண்டும். 

இதற்கிடையில், புதிய தலைமுறையில் பிரேம் சங்கருடன் இணைந்து வழங்கிய கருப்பு கட்சியைச் சேர்ந்த வெள்ளை குணாவுக்கு, அங்கு நிலவரம் கலவரமாக மாறிவிட்டது.

இந்தக் கடை போனால் சந்தைக் கடை.

காட்சி ஊடகம் போனால் என்ன, இதோ இந்தியா டுடே வாய்ப்பு... நல்லதுதான், இதுபோன்ற (அது என்னவோ சொல்றாகளே, அப்கண்ட்ரி, வடக்கத்தியான் கம்பெனி) இடங்களில் உங்களின் அரசியல் கூர்மையைக் காட்டினால், இந்த தமிழ்ச் சமூகம் பயன்பெறட்டுமே! குணசேகரனுக்கும் முன்னதாக, திராவிட‌ அன்பர்கள் இப்படி நினைக்கலாம்.

குணா மீது சில‌ விமர்சனங்கள் இருந்தாலும் , இவர் இந்தியா டுடேவுக்குப் போய்விட்டால், புதிய தலைமுறைக்கு ஒரு இழப்புதான்!

குணா மட்டும் இல்லை,இந்தியாடுடே ஆசிரியர் பணிக்கு, இன்னும் இருவரும் களம் இறங்கியிருக்கிறார்கள்.

ஒருவர், டெக்கான் கிரானிக்கல் ஆங்கில நாளிதழில் கடைசியாக வேலைபார்த்த கவிதா முரளிதரன். அதன் பிறகு, தந்தி டிவி, புதிய தலைமுறை, விஜய் டிவி ஆகியவற்றில் அடிக்கடி தோன்றி பல்வேறு பிரச்னைகளுக்கும் கருத்துத் தெரிவித்து வருவதை வாசகர்கள் அறிந்திருப்பார்கள்.

இவரைத் தவிர, தமிழ் நாளிதழ் ஒன்றில் நீண்ட காலம் பணியாற்றிய ஒருவரும் முயற்சி செய்கிறார்.

சபாஷ், சரியான போட்டி! 

சகலரும் சகல திறமைகளையும் கொண்டவர்கள்தான்! 

யாருக்கு வெற்றி கிடைக்கும் பார்ப்போம்.

ஆனால் யார் வந்தாலும் வியாபாரத்துக்காக அந்த நிறுவனம் 2 மாதத்திற்கு ஒருமுறை வெளியிடும் வக்கிர சர்வே மட்டும் நிற்காது என்பது மட்டும் நிச்சயம்...!