Monday, 27 April 2015

குமுதம் கூட்டுக்களவாணி…! அர்ச்சனை வைரமுத்துவுக்கு மட்டும்..!


டந்த வாரம் முழுவதும் இணையம் முழுவதும் வைரமுத்துவின் மீதான அர்ச்சனை தான். ’குமுதம்’ வார இதழில் வெளிவரும் வைரமுத்துவின் சிறுகதைகளைப் பாராட்டி  மறைந்த எழுத்தாளர் ஜெயகாந்தன் கடிதம் எழுதினார் என்று அதை ‘குமுதம்’ வெளியிட்டது. அதையொட்டித் தான் சர்ச்சை தொடங்கியது. 

அதே ’குமுதம்’ இதழில் தொடர் எழுதிவரும் ஜெயகாந்தனின் மகள் தீபலட்சுமி இது என் தந்தை எழுதிய கடிதம் இல்லை என முகநூலில் மறுக்க இணையம் பற்றிக்கொண்டது. அதன் மறுநாள்  கோலப்பன் The hindu வில் இதனை முக்கிய செய்தியாக்க தொடர்ந்து வைரமுத்துவை வரிசை கட்டி அடித்தார்கள். 

வைரமுத்து புகழுக்காகவும் பணத்துக்காகவும் எதையும் செய்யத் துணிபவர்,இதையும் செய்திருப்பார் என்பதில் எந்த சந்தேகம் இல்லை. ஆனால் சம்பந்தப்பட்ட ’குமுதம்’ இதழைப்  படித்த எவரும் முழுக் களவாணித்தனமும் வைரமுத்துவிடம் இல்லை. என்பதையும் ’குமுதம்’ இதழுக்கும் இதில் முக்கியப்பங்கு உள்ளது என்பதையும் அறிய முடியும்.

கடிதத்தை பிரசுரித்த ’குமுதம்’ அதற்கு முன்பு ஒரு பக்கத்திற்கு இதனை வெளியிட்டிருக்கிறது.

//ஜெயகாந்தன் தன் கடைசி நாட்களில் குமுதத்தில் வெளிவரும் வைரமுத்து சிறுகதைகளைப் படித்தும் படிக்கச் சொல்லிக் கேட்டும் வந்தார் என்று அறிந்தோம். அதுகுறித்த அவரது அபிப்ராயத்தைப் பதிவு செய்ய முடியுமா என்று அன்போடு கேட்டோம். அதை ஒரு கடிதமாக கவிப்பேரரசு வைரமுத்துவின் வீட்டுக்கே ஆள் மூலம் அனுப்பி விட்டார்.//

குமுதத்தில் வெளிவரும் வைரமுத்துவின் சிறுகதைகள் குறித்த அபிப்ராயத்தை  ஜெயகாந்தனிடம் நாங்கள் கேட்டோம்.அவர் அதனை வைரமுத்துவின் வீட்டுக்கே அனுப்பி விட்டார் என குமுதம் சொல்கிறது. வைரமுத்து என்ன சொல்கிறார் ? 

வீட்டுக்கு ’வந்த’ கடிதத்தை வெளியிடக் கொடுத்திருக்கிறார். ஆக இதில் தவறு நடந்துள்ளது எங்கு ? 




குமுதத்திடம் இருந்து தான் தொடங்குகிறது. கருத்தை ஜெயகாந்தனிடம்  கேட்டோம்,கவிஞரின் வீட்டுக்கு ஆள் மூலம் கடிதத்தை அனுப்பி விட்டார் எனக் குமுதம் தான் சொல்கிறது. அதன்பின்பு ’தி இந்து’ ரிப்போர்ட்டர்  கோலப்பன் கேட்கையில் வேறு என்ன பதிலை வைரமுத்துவால் சொல்ல இயலும்..? 

ஆம்.கடிதம் வீட்டுக்கு வந்தது என்று தான் வைரமுத்து சொல்ல முடியும்..? இல்லை குமுதம் அலுவலகத்தில் தயாரிக்கப்பட்டது என்றோ இல்லை என் வீட்டில் தயாரித்தேன் என்றா சொல்ல முடியும்.? 

இதன்படி பார்த்தால் வந்த கடிதத்தை குமுதம் அலுவலகத்தில் சேர்ப்பித்ததைத் தவிர வேறு எந்தத் தவறும் வைரமுத்துவிடம் இல்லை. மோசடி முழுக்க முழுக்க குமுதத்தின் மீது தான் இருக்கிறது. வைரமுத்து அதற்கு உடந்தை என்று வேண்டுமானால் சொல்லலாம்.

னால் ஜெயகாந்தனின் மகள் எழுதிய பதிவின் படி 



இதன்படி பார்த்தால் வைரமுத்து மீது தான் முழுக்கத் தவறு இருக்கிறது. இவரே ஒரு கடிதத்தைத் மோசடியாகத் தயாரித்திருக்கிறார். ஆனால் அதனை நேரடியாக வெளியிடாமல் குமுதம் வார இதழ் கடிதம் கேட்டதாகவும் அதன்படி ஜெயகாந்தன் பாராட்டுப் பத்திரத்தை வீட்டுக்கு அனுப்பியதாகவும் குமுதம் ஆசிரியர் குழுவை திரைக்கதை எழுத வைத்திருக்கிறார். 

தன் மோசடிச் செயலுக்கு குமுதத்தை உடந்தையாக்கி  இருக்கிறார். மோசடியில் பி.எச்.டி பட்டம் பெற்ற அவர்களும் இதனை மகிழ்ச்சியாய்ச் செய்திருக்கிறார்கள். 

தனது வார இதழில் வெளியாகும் வைரமுத்துவின் சிறுகதைகளைப் பிரபல்யமாக்கும் நோக்கத்துடனும் அதனைப் புத்தகமாகப் பதிப்பிக்கும் பொழுது அது ’குமுதம் பப்ளிகேஷன்ஸ்’ வெளியீடாக வரும் பொழுது அதற்கு இலக்கிய அந்தஸ்து கொடுப்பதற்கும் அதன் சந்தை மதிப்பை அதிகப்படுத்தவும் ’குமுதம்’ இதழ் தெரிந்தே துணை போயிருக்கிறது. குமுதம் உடந்தையாய் இருந்ததால் தான் இவ்வளவு பெரிய மோசடியைச் செய்து மிகப்பெரிய அறுவடையைச் செய்யவும் வைரமுத்து துணிந்து இறங்கியிருக்கிறார்.

 இதனால் இருவருக்கும் ஒருசேர லாபம். கடிதம் கண்ட 'கவிஞர்' வீட்டுக்குச் சென்று நன்றி சொன்னாராம் என மோசடியில் தனக்குத் தொடர்பில்லாதது மாதிரி முன் எச்சரிக்கையாய் கிசுகிசு பாணியில் பாலோ அப் செய்தியையும் குமுதம் எழுதியிருக்கிறது. 



ஆனால் இணையப் பயன்பாட்டாளர்களும்,அறிவுஜீவிகளும் ’தி இந்து’ கோலப்பனும்,குமுதத்தில் தொடர் எழுதும் ஜெயகாந்தனின் மகளோ ஒட்டுமொத்தமாய் வைரமுத்துவின் மீது மட்டுமே பாய்கிறார்கள். அதற்கு ஒன்று வைரமுத்துவின் மீதான வெறுப்பு காரணமாய் இருக்க முடியும்,அல்லது குமுதம் இதழ் மீதான பாசம் அல்லது குமுதத்தைப் பகைத்தால் என்றாவது அதில் வெளிவரும் துக்கிணியூண்டுச் செய்தி வராமல் போய்விடக்கூடாதே என்ற முன் எச்சரிக்கை என ஏதாவது ஒன்று காரணமாய் இருக்க முடியும். அல்லது சம்பந்தப்பட்ட குமுதம் வார இதழைப் படிக்காமல் தான் படித்த, கேட்ட செய்தியை வைத்துக்கொண்டு எழுதித் தள்ளுவது மட்டுமே காரணமாய் இருக்க முடியும்.

இவ்வளவு நடந்தும் சம்பந்தப்பட்ட ’குமுதம்’ இதழோ ஒரு வருத்தமோ,விளக்கமோ எதுவும் வெளியிடாமல் அடுத்த இதழைக் கொண்டு வந்துள்ளது. வைரமுத்துவைப் போல தான் செய்த மோசடித்தனத்தில் கடைசி வரை உறுதியாய் நின்று உண்மையாக்கி விடமுடியும் என நம்புகிறது போலும். 

மாபெரும் எழுத்தாளனின் மரணத்தில் கூட மோசடித்தனம் செய்து புகழுக்கும் வணிகத்துக்கும் வெறிபிடித்து அலையும் வைரமுத்துவும் குமுதமும் சரியான ஜோடி தான்.

Thursday, 16 April 2015

கலாநிதி மாறனின் அல்ஷேசன் நாய்க்கு வெறி..! ஊழியரைக் கடித்துக் குதறியது..!!



டந்த 25 ஆண்டுகளில்  மனித உரிமை பற்றிய விழிப்புணர்வு அனைத்து மட்டங்களிலும் ஏற்பட்டு விட்டது. மாதா,குரு என்ற வரிசையில் உள்ளவர்கள் தங்களின் உரிமைக்குத் தீங்கிழைத்தாலும் அதற்கு எதிரான குரல்கள் எழத்தான் செய்கின்றன. ஆசிரியர் மாணவனைப் பிரம்பால் அடித்து நாடு தழுவிய விவாதமாய் எத்தனையோ முறை எழுந்துள்ள‌து. ஊடகங்களும் அத்தகைய குரல்களுக்கு முக்கியத்துவம் அளித்து வெளியிடுகின்றன. இதனால் யாரும்  வெளிப்படையாய் தீங்கைச் செய்ய அஞ்சுகின்றார்கள்.

ஆனால் நம் கையில் இந்தியாவின் மிகப்பெரிய ஊடக குழும‌ம் இருக்கிறது,நம்மை யாரும் எதுவும் செய்ய முடியாது என்னும் திமிரில்,கொழுப்பில் ஆணவத்தில் அதிகார மமதையில் தனக்கு கீழ் வேலை செய்த ஒரு சாதாரண ஊழியனை அடித்து மிதித்து சித்திரவதை செய்து கொலை மிரட்டல் விடுத்த ரவுடி கம் நாளிதழ் ஆசிரியர் மற்றும் நிர்வாக இயக்குனர் மீதான குற்றப் பட்டியல் இது.

தினகரன் நாளிதழ் கே.பி.கே குமரன் தரப்பிடமிருந்து விலைக்கு வாங்கப்பட்ட பின்பு அதன் ஆசிரியர் மற்றும் நிர்வாக இயக்குனராய் பொறுப்பேற்றவர் ஆர்.எம்.ஆர்.ரமேஷ்.

இவருக்கு ஊடகம் குறித்து என்ன தெரியும்..?

இவர் ஆசிரியர் பொறுப்பேற்ற பொழுது, தனக்கு கீழ் பணியாற்றிய ஊழியர்களிடம் இவரது வார்த்தைகளிலேயே சொல்வதென்றால், "பத்திரிகை குறித்து  எனக்கு எதுவும் தெரியாது."

அப்படியென்றால் இவருக்கு எப்படி இந்தப்பதவி கிடைத்தது ?

கலாநிதிமாறனின் கல்லூரித் தோழர். அது மட்டுமல்ல,அவரது அனைத்து சட்டவிரோத காரியங்களுக்கும் துணை நிற்பவர். இது ஒன்று போதாதா மாறன் சாம்ராஜ்யத்தின் தளபதியாய் பொறுப்பேற்க..?

கலாநிதிமாறன் கோபத்தில் இருந்தால் இவரை 'நாய்' என்றும் மகிழ்ச்சியாய் இருந்தால் 'அல்சேஷன் டாக்' என்றும் அழைப்பார்.(அல்ஷேசன்கள் கலாநிதியை மன்னிக்க வேண்டும்)

இவர் தான் ஒட்டுமொத்த 'தினகரன்' சாம்ராஜ்யத்தின் தளபதி.இவருக்கு விசுவாசமான ஆட்கள் தான் ஆசிரியராகவும் அனைத்து பதிப்புகளிலும் மேலாளர்களாகவும் இருக்கிறார்கள். இவரன்றி 'தினகரன்' நாளிதழில் அணுவும் அசையாது. ஊழியர்களின் சம்பள உயர்விலிருந்து புதிதாய் நியமிக்கப்ப‌டுவது வரை மற்றும் நிர்வாகம் முழுமையும் இவரது அனுமதியின் பெரிலும் தலையசைப்பிலும் நடக்கும். இவருக்கு முகஸ்துதி போட்டு பிழைப்பு நடத்தும் கும்பல் 'தினகரனில்' மிக அதிக அளவில் இருக்கிறது என்பது உபரித்த‌கவல்.

இந்த அறிமுகம் போதும் என நினைக்கிறோம்.

இனி இவர் ஊழியர்களிடம் நடப்பது குறித்து சிறு அறிமுகம்.

யாரையும் இவர் மரியாதையாக நடத்தியது கிடையாது, எவ்வளவு பெரிய அனுபவசாலி,வயதில் முதியவர் என்றாலும் ஒருமையிலும் தரக்குறைவாகவும் தான் வார்த்தை வரும்.

ஆனால் வல்லவன் உண்டல்லவா..?

இவருக்கு சுயமரியாதை பாடம் எடுக்கும் தைரியம் ஒருவருக்கு இருந்த‌து.

அப்பொழுது 'சன் நியூஸ்' ஆங்கில சேனல் ஒளிபரப்பாகி கொண்டு இருந்த‌து. அண்ணா அறிவாலய வளாகத்தில் தான் அலுவலகம்.

ஆர்.எம்.ஆர் எடிட்டோரியலில் நுழைகிறார். அங்கு ஒரு ஊழியரை அழைக்கிறார் எப்படி தெரியுமா..?

"டேய் இங்க வாடா..?"

யாரும் திரும்பவில்லை.திரும்பவும் அருகில் சென்று அழைக்கிறார்.

"டேய் இங்க‌ பாருடா..? உன்னைத் தாண்டா..? காது செவிடா..?"

அந்த ஊழியர் சடாரென்று கோபத்துடன் திரும்புகிறார். அவரது பெயர் நம் ஞாபகத்தில் இல்லை.'பிலிக்ஸ்' என வைத்துக் கொள்வோம்.  திறமையானவர்.

"மிஸ்டர் ஆர்.எம்.ஆர்.,முதலில் மரியாதையாக பேசக் கற்றுக் கொள்ளுங்கள். "

கூழைக்கும்பிடு போடுபவனையும்,அச்சத்துடன் விலகிச்செல்பவனையும்,போலி மரியாதையையும் பார்த்துப் பழகிப்போன ஆர்.எம்.ஆருக்கு  இந்தப் பதிலைக் கேட்டவுடன் முகம் மாறுகிறது. ஆனாலும் சமாளிக்கிறார்.

"என்னப்பா நான் என்ன சொல்லிட்டேன்,நம்ம ரெண்டு பேருக்கும் இருக்கும் பழக்கத்தில் தானே இப்படிக் கூப்பிட்டேன்" என சமாளிக்கிறார்.

நண்பர் விடவில்லை. "நம்ம ரெண்டு பேருக்கும் எவ்வளவு வருட பழக்கம் ?இங்கு வேலைக்கு வந்த பின்னாடித்தான் தெரியும்.அப்புறம் எப்படிக் கூப்பிடலாம்..? சரி நானும் அதே காலப் பழக்கம் தானே..? உங்களை டா போட்டு கூப்பிடலாமா மிஸ்டர்..? "

ஆர்.எம்.ஆர்.வெலவெலத்துப் போகிறார்.

"உங்க கூடத்தான் படிச்சார் கலாநிதி மாறன்,அவரை எல்லோர் முன்னாடியும் டா போட்டுக் கூப்பிட முடியுமா..? முதலில் மரியாதையா நடந்துக்கோங்க‌..நீங்க‌ எவ்வளவு பெரிய ஆளா இருந்தாலும் அது பத்தி எனக்கு கவலையில்லை."

வெளிறிய முகத்துடன் வெளியேறுகிறார்.

னது ஊழியரை இவ்வாறு இழிவாய் நடத்தும் ஆர்.எம்.ஆர் தனது முதலாளியிடம் எப்படி கூழைக் கும்பிடு போடுவார் தெரியுமா..? அதற்கு ஒரு சம்ப‌வம் சொல்கிறோம்.

தயாநிதி மாறன் மத்திய ஜவுளித்துறை கேபினட் அமைச்சராய் பதவியேற்ற சமயம்.

'தினகரன்' அலுவலக ஊழியர்கள், கச்சேரி சாலை அலுவலகத்தில்  சந்தித்து வாழ்த்து தெரிவிக்கின்றனர்.

 'தினகரன்' மற்றும் 'தமிழ் முரசு' ஆசிரியர் (பொறுப்பு) வகிக்கும் திரு.கதிர்வேல் தலைமையில் ஒரு பிரிவு செல்கிறது. அவருடன் 'தமிழ் முரசு' நியூஸ் எடிட்டர் மனோஜ் மற்றும் நிருபர் மோகன் ஆகியோரும் உடன் செல்கின்றனர்.

தயாநிதிமாறன் முன்பு இவர்கள் சரிக்குச் சமமாய் அமர, 'தினகரன்' இதழின் அதிகாரபூர்வமான ஆசிரியர் மற்றும் நிர்வாக இயக்குனர் ஆர்.எம்.ஆர்.எப்படி நடந்து கொள்கிறார் தெரியுமா..?



ஒரு ஓரத்தில் கைகட்டி ஆபிஸ் பையன் மாதிரி நிற்கிறார். இத்தனைக்கும் தயாநிதி மாறனின் உடன்பிற‌ந்த சகோதரன் கலாநிதிமாறனின் கல்லூரித் தோழர் மற்றும் நண்பர் தான் ஆர்.எம்.ஆர். ஆனால் இளைய முதலாளி முன்பு சேரில் அமராமல் கைகட்டி சேவகம் செய்கிறார். இப்படி கூழைக்கும்பிடு போடுபவர் தான் இவர்.

ஆனால் இதே ஆர்.எம்.ஆரோ தனக்கு கீழ் வேலை செய்யும் தொழிலாளியை கொத்தடிமை போல் நடத்துகிரார்.

எஸ்.பி.வீட்டில் ஆர்டர்லி வேலை பார்க்கும் காவலர்,தனனைத் தேடி காவல்நிலையம் வரும் அப்பாவியைத் தூக்கிப் போட்டு மிதிப்பதில்லையா..? அந்த எடுத்துக்காட்டு ஆர்.எம்.ஆருக்கு முற்றிலும் பொருந்தும்.

இனி ஆர்.எம்.ஆரின் ரவுடித் தனத்தைப் பார்ப்போம்.தினகரனில் உதிய உயர்வு இரண்டு ஆண்டுகளாய் மறுக்கப்பட்டு வந்தது.

 இந்த நிலையில், ஏப்ரல் 9 ஆம் நால் ஊதிய உயர்வு சிலருக்கு மட்டும் கண்துடைப்பாய் அளிக்கப்ப‌ட்டது. அதை எதிர்த்து பெரும்பாலோனோர் அமைதி காக்க சுயமரியாதை மிக்க லேஅவுட் ஆர்ட்டிஸ்டுகள் ஏப்ரல் 10 ஆம் தேதி அலுவலகத்தில் உள்ளிருப்பு போராட்டம் நடத்துகின்றனர்.



***

கேஷ் பழைய  தினகரன் ஊழியர்.ஆபிஸ் பாயாக தினகரனில் 5 வருடமும்,அதைத்தொடர்ந்து  லே அவுட் ஆர்ட்டிஸ்டாக 7 வருடமும் வேலை பார்த்தவர்.

இனி நடந்த சம்பவத்தை பாதிக்கப்ப‌ட்ட லேஅவுட் ஆர்ட்டிஸ்டான மகேஷ் வார்த்தைகளிலேயே கேட்போம்.

மகேஷ்


"நான் சென்னை கச்சேரி சாலையில் அமைந்துள்ள 'தினகரன்' நாளிதழ் அலுவலகத்தில் லே அவுட் ஆர்ட்டிஸ்டாக கடந்த 7 ஆண்டு காலமாய்ப் பணிபுரிந்து வருகிறேன். இந்நிலையில் கடந்த இரண்டு ஆண்டுகளாய்  எனக்கு ஊதிய உயர்வு கொடுக்கவில்லை.  

அதனால் கடந்த 10.04.2015 அன்று நானும் இன்னும் சில அலுவலக ஊழியர்களும் ஊதிய உயர்வு கோரி தினகரன் அலுவலகத்தினுள் உள்ளிருப்பு போராட்டம் நடத்தினோம். அப்பொழுது எங்களுடன் தலைமை வடிவமைப்பு நிர்வாகி திரு.வேதராஜன் சமாதானப் பேச்சு வார்த்தை நடத்தினார். 

ஆனால் நாங்கள் ஒப்புக் கொள்ளாததால் ஆசிரியர் பொறுப்பு வகிக்கும் திரு. ராமன்   எங்களுடன் பேச்சு வார்த்தை நடத்தினார். அதிலும் உடன்பாடு ஏற்படவில்லை. அதைத்தொடர்ந்து தலைமை நிருபர் திரு.சுரேஷ் வேதநாயகம் எங்களுடன் பேச்சுவார்த்தை நடத்தினார்.

எங்களின் குறைகளை எழுதித் தருமாறும் நிர்வாக இயக்குனர் ஆர்.எம்.ஆர்.ரமேஷ்  கவனத்துக்கு கொண்டு சென்று தீர்வு வாங்கித் தருவதாகவும் உறுதி அளித்து எங்களின் கோரிக்கையை எழுதி வாங்கிக் கொண்டார். அதை ஏற்றுக் கொண்டு நான் உட்பட அனைவரும் எமது கோரிக்கையை எழுதி அவரிடம் தனித்தனியாய்க் கொடுத்தோம்.

என்னிடம் கடிதம் வாங்கும் பொழுது திரு சுரேஷ் வேதநாயகம்,நிர்வாகத்துக்கு எதிராய் உனது செயல்பாடு இருக்கிறது, அதற்கான விலையை நீ கண்டிப்பாய் கொடுக்க வேண்டி வரும் என மிரட்டினார்.ஆனால் நாங்கள் அமைதியாக இருந்து விட்டோம்.

அதன் பின் 13-04-2015 தினகரன் அலுவலகத்தில் மதியம் 12.45 மணி அளவில் பணியில் இருந்த பொழுது டெலிபோன் ஆபரேட்டர் வனிதா எனக்கு போன் செய்து மதியம் 2.30 மணிக்கு நிர்வாக இயக்குனர் திரு.ஆர்.எம்.ஆர் ரமேஷைச் சந்திக்க எம்.ஆர்.சி.நகரில் அமைந்துள்ள‌ சன் நெட்வொர்க் தலைமை அலுவலகத்துக்கு செல்லுமாறு கூறினார். 

அதனை ஏற்று நான் உடனடியாக சுமார் 1.30 மணி அளவில் அங்கு சென்றேன். அந்த சமயத்தில் திரு.ஆர்.எம்.ஆர்.ரமேஷ் அங்கு இல்லை,அவரது உதவியாளர் திரு.மணி என்பவர் மட்டும் இருந்தார். அவர் நிர்வாக இயக்குனர் மதிய சாப்பாட்டுக்கு சென்றிருப்பதாகவும் மாலை 3 மணி அளவில் வருமாறும் கூறினார். அதைக்கேட்டு நான் மீண்டும் தினகரன் அலுவலகத்துக்கு பணிக்குச் சென்றேன்.

அதன் பின்  சுமார் 2.15 மணி அளவில் மீண்டும் சன் நெட்வொர்க் அலுவலகத்துக்கு நானும் சக ஊழியர் ராஜூம் கிளம்பிச் சென்றோம், அப்பொழுது சன் நெட்வொர்க் அலுவலகம் அருகில் தினகரன் தலைமை நிருபர் திரு.சுரேஷ் வேதநாயகம்,எங்களை வழிமறித்து,எம்.டி, ஆர்.எம்.ஆரிடம் எதிர்த்து பேச வேண்டாம், நடைபெற்ற போராட்டத்துக்கு வடிவமைப்பு நிர்வாகி திரு.வேதராஜன் தான் காரணம் எனச் சொல்லுங்கள் ,ஆர்.எம்.ஆர்.ரமேஷ் கோபமாக இருந்தால் காலில் விழுந்து விடுங்கள்,அவர் மன்னித்து விடுவார்,இல்லையென்றால் சிக்கல் தான் என எச்சரித்தார்.

அடியாளுக்கு ஆள்காட்டி சுரேஷ்

அதன்பின் நானும் திரு.ராஜூம் சுமார் 2.30 மணி அளவில் சன் நெட்வொர்க் தலைமை அலுவலகம் சென்றோம்.அங்கு நாங்களும் எனது சக லே அவுட் ஆர்ட்டிஸ்டுகள் மதி,அருணாச்சலம்,சுதாகர் ஆகியோர் அவர் அறை அருகில் காத்திருந்தோம்.நாங்கள் அனைவரும் சுமார் 3.15 மணி அளவில் தினகரன் நிர்வாக இயக்குனர் அழைப்பின் பேரில் உள்ளே சந்திக்கச் சென்றோம்.

உள்ளே நுழைந்தவுடன் எங்கள் அனைவரையும் பார்த்த திரு.ஆர்.எம்.ஆர்.ரமேஷ்,"வாங்கடா தேவடியா பசங்களா கொடுக்குறதை வாங்கிட்டு வேலையைப் பாருங்க‌டான்னா ஸ்டிரைக் பண்றீங்களாடா" எவ்வளவு திமிருடா..? என தரக்குறைவான வார்த்தைகளால் எங்களை கடுமையாகத் திட்டியதோடும் இல்லாமல் தனது இருக்கையில் இருந்து எங்களை நோக்கி தாக்கவும் முயன்றார். அதைக் கண்டு அச்சத்துடன் இதர ஊழியர்கள் அனைவரும் அவரது காலில் விழுந்தனர். ஆனால் நான் மட்டும் அமைதியாய் இருந்தேன்.

 இதனால் ஆத்திரமடைந்த ஆர்.எம்.ஆர்.ரமேஷ் என்னை சராமாரியாகத் தாக்கினார்.அப்பொழுது நிலை தடுமாறி கீழே விழுந்தேன்,அதைத்தொடர்ந்து என் கழுத்தில் காலை வைத்து,எங்களை எதிர்த்தால் கொலை செய்து விடுவதாய் மிரட்டினார். நான் எதுவும் செய்வதறியாது உயிர் பயத்துடன் அமைதியாய் இருந்தேன்.

அதன் பின் அனைவரையும் மீண்டும் தரக்குறைவான வார்த்தைகளால் திட்டிய ஆர்.எம்.ஆர்.ரமேஷ், கதிர் இப்படித்தான்,நான் வாங்க மட்டேன்னு நினைச்சு ரிசைனிங் லெட்டர் கொடுத்தாரு. நான் எதுவும் சொல்லாம வாங்கிட்டேன். இப்ப என்ன நிலைன்னு தெரியுமா..? இங்க இருக்கும் வரைக்கும் தான் உங்களுக்குமதிப்பு. என்று சொல்லி மீண்டும் எங்களை கடுமையாகத் திட்டினார். 

என்னுடைய அடையாள அட்டையை மட்டும் பிடுங்கிக் கொண்டு,எல்லோரையும் கிளம்பச் சொன்னார். எல்லோரும் சென்ற பின்பும் நான் அமைதியாய் இருந்தேன்.

 "இப்படியே ஓடிப்போயிரு,இனிமேல் எங்காவது பார்த்தால் உன்னை மட்டுமல்ல உனது குடும்பத்தில் எல்லாரையும் சாவடிச்சுடுவேன்" என்று மிரட்டினார். அதன் பின் அவரது அலுவலக உதவியாளரை அழைத்து என்னைக் கழுத்தைப்பிடீத்து வெளியே தள்ளச் சொன்னார்.அதற்குள்ளாக நானாகவே வெளியே வந்து விட்டேன். "


(இந்த நிலையில் தினகரன் நிர்வாகத்துக்குச் சொந்தமான புதுத்தெருவில் உள்ள இடத்தில் தங்கியிருந்த மகேஷ் அங்கிருந்து வலுக்கட்டாயமாய் வெளியேற்றப்பட்டிருக்கிறார்.பாதிக்கப்ப‌ட்டவர் இன்னும் அச்சத்தில் இருப்பதால் புகார் கொடுப்பது குறித்து தயங்குகின்றார்.)



திய உயர்வு கோருவதும்,அதற்காய் போராட்டம் நடத்துவதும் தொழிலாளர்களின் அடிப்படை உரிமை.ஆனால் அப்படி நடத்திய தொழிலாளிகளை தரக்குறைவாகப் பேசியும் அச்சுறுத்தியும் காலில் விழ வைத்துப் பணியவைத்திருக்கிறார் அடியாள் ஆர்.எம்.ஆர்.அதற்கு உடன்படாத ஒரு தொழிலாளியை அடித்து உதைத்து கொலை மிரட்டல் விடுத்திருக்கிறார்.இதற்கெல்லாம் காரணம் நம்மிடம் ஊடக பலம் இருக்கிறது,நாம் மாறனின் அடியாள் என்னும் திமிர் தான்.ஜெயலலிதா ஆட்சியிலேயே இந்த ரவுடித்தனம் என்றால் கருணாநிதி ஆட்சியில் இவர்கள் எவ்வளவு கொட்டம் ஆடியிருப்பார்கள் என்று நினைத்துப் பாருங்க‌ள். 

மகேஷை தாக்கிய அதே நாளில் ஊதிய உயர்வு கோரி போக்குவரத்து தொழிலாளர்கள் நடத்திய போராட்டம் தினகரனில் விரிவாய் வெளிவந்திருக்கிற‌து. ஆனால் இன்னொருபுறமோ தன்னிடம் ஊதிய உயர்வு கோரிய பணியாளனை அத‌ன் நிர்வாக இயக்குனர் எனச் சொல்லிக்கொள்ளும் ரவுடி தாக்கியிருக்கிறார். 

'தினகரன்' நிறுவனத்துக்குள் நீங்கள் நுழையும் முன்பிருந்து அந்த நிறுவன வளர்ச்சிக்குத் தங்களை அர்ப்பணித்தவர்கள் மகேஷ் போன்றவர்கள். ஆனால் நீங்க‌ளோ சுரண்டவும் ஏமாற்ற‌வும் பிழைக்கவும் மட்டுமே இந்த நிறுவனத்துக்குள் நுழைந்தவர். இந்த வழக்கில் நீங்கள் தப்பிக்கலாம்,ஆனால் இது என்றும் நீடிக்காது.

நாம் ஆர்.எம்.ஆருக்குச் சொல்லிக் கொள்வது எல்லாம் ஒன்று தான்.

உலகையே அடக்கி ஆண்ட எத்தனையோ சாம்ராஜ்யங்கள் கடைசியில் மண்ணோடு மண்ணாய்ப் போயிருக்கிற‌து. அதனை ஒப்பிடும்பொழுது மாறன் சாம்ராஜ்யம் தூசுக்குப் பெறாது. அதுவும் நீங்களோ நாட்டைச் சுரண்டிய மாறனை அண்டிப்பிழைத்தும் சுரண்டியும் வாழ்க்கை நடத்துபவர். உங்களின் நிலை மாறவும், வீழவும், தெருவில் திரியவும் காலம் அதிகமில்லை. 

அன்று தெரு நாய் கூட உங்கள் மேல் மூத்திரம் பெய்யும் .


Thursday, 9 April 2015

சாதி, மதவெறி ரங்கராஜ் பாண்டே.! பாதுகாக்கும் தந்தி டிவி..!




சென்னை ஆழ்வார்பேட்டை.சி.பி.ராமசாமி சாலையில் கீர்த்திலால் ஜூவல்லர்ஸ் எதிரில் இருக்கும் அபிராமபுரம் பழச்சாறு கடை.

ஊடகவியலாளர்கள் ரவிக்குமார்,பெஞ்சமின்,அன்பரசு,அன்வர் சந்திப்பு.
 
புதிய தலைமுறை அலுவலகம் தாக்குதலுக்கு நம்ம கடுமையான கண்டனத்தைத் தெரிவித்து இன்றைய கூட்டத்தை ஆரம்பிப்போம்,சொல்லியபடியே அன்வர் ஆரம்பித்தார்.

"தினகரனில் ஊதிய உயர்வு போட்டுட்டாங்கன்னும்,வழக்கம் போல் தனிப்பட்ட விருப்பு வெறுப்புடன் அளிக்கப்பட்டிருக்குதுன்னும் தகவல் வருது.எதுக்கும் விசாரித்து விரிவா எழுதுங்க."

" சரி விசாரிப்போம். இன்னும் மஜிதியா கமிட்டி பரிந்துரையை பெயருக்கு கூட அமல்படுத்தலையாமே..? "

"அப்படி ஒரு எண்ணமே துளியும் இல்லைன்னு சொல்றாங்க "ரவிக்குமார் சிரித்தபடியே சொன்னார்.

" மஜிதியா கமிட்டி பரிந்துரையை நிறுவனங்க‌ள் ஒழுங்காக அமல்படுத்துகிறன்றனவா என்று கண்காணிக்க அரசு ஒரு கமிட்டி நியமிச்சிருக்காங்களே..! அது எப்ப‌டி செயல்படுது..? " பார்த்தசாரதி

"அந்த கமிட்டியே தகுதி இல்லாத நபர்களால் நியமனம் செய்யபட்டிருக்குது."







"இதில் நியமிக்கப்பட்டிருக்கும் சகாயராஜ் யாருன்னு ஊர் உலகத்துக்குத் தெரியும், சகாயராஜை 'மஜிதியா கமிட்டி' பரிந்துரை தொடர்பான‌ கூட்டத்துக்கு அழைத்தால் பழக்க தோஷத்தில் நான்கு பேர் வந்திருக்கிறோம்,கவர் கொடுங்க என அதிகாரிகளிடமே கேட்டாலும் ஆச்சரியப்படுவதற்கில்லை.அப்படிப்பட்ட பேர்வழி. கோபால் ரிட்டயர்ட் ஆகி வீட்டில் இருப்பவர்.

சகாயராஜ்


அன்பு யோக்கியதை நம் வாசகர்களுக்குத் தெரியும். அன்பழகனின் லெட்டர் பேடு அமைப்பான‌ 'சென்னை யூனியன் ஆப் ஜர்னலிஸ்ட்' கணக்குகள் தாக்கல் செய்யலைன்னு சங்கப் பதிவையே  ரத்து பண்ணிட்டாங்க‌.


ஆனால் இப்படிப்பட்ட பேர்வழிகள் தான் கமிட்டியில் இருக்காங்க. இப்படியானவர்கள்  எப்படி பரிந்துரையை அமல்படுத்த ஊடக நிறுவனங்களிடம் வலியுறுத்துவாங்க. "

அன்வர் கடைசி வரை நம்பிக்கை இன்றியே சொல்லி முடித்தார்.
**


"தந்தி டிவி' ரங்கராஜ் பாண்டே பெயர் திரும்பவும் சர்ச்சைக்குரியதாக இருக்குதே..? " பார்த்தசாரதி அடுத்த பஞ்சாயத்துக்கு தாவினார்.

பாண்டே என்பதே பீகாரில் இருக்கும் பார்ப்பனர் என்றும் சாதி வெறியுடன் அதனைத் தனது பெயருடன் இணைத்திருக்கிறார்,இது மட்டுமல்ல செங்கொடியின் தியாகத்தைக் கொச்சைப்படுத்தியவர் தான் இந்தப் பேர்வழி என்பதையும்  நாம் ஏற்கனவே பதிவு செய்திருக்கிறோம் "அன்வர்

"  அந்த நேர்காண‌லில் வீரமணியிடம் போதுமான தரவுகள் இல்லை என்பது உண்மை தான். ஆனால் பாண்டே ஒரு ஊடகவியலாளராய் நடந்து கொள்ளவில்லை என்பதும் குறிப்பிட்டுச் சொல்லப்பட வேண்டிய விஷயம்  "ரவிக்குமார் கோபப்பட்டார்.

"ஆமாம், நேர்காணலில் எந்த ஆதாரத்தையும் குறிப்பிட்டுக் காட்டாத சாதி வெறி பாண்டே நிகழ்ச்சி முடிந்தவுடன் இணைத்திருக்கிறார். இது மிக தவறானது. இது குறித்து ஒரு பாக்ஸ் மேட்டர் இருக்கு கடைசியா சொல்றேன் " பெஞ்சமின் தொடர்ந்தார்.

"சரி,அது மட்டுமல்லாமல் 'வீரமணி' என்று பெயரைச் சொல்லி அழைத்தார். இது உண்மையில் தவறா என்று பார்த்தால் தவறில்லை தான். ஆனால் இதே அணுகுமுறையை அவர் மோடியிடமும் காட்டியிருக்க வேண்டும்,மோடியின் நேர்காணலில் நரேந்திரன் என்று அழைத்திருக்க வேண்டும்,அதை விட்டு விட்டு அங்கு பம்மி விட்டு, வீரமணி எனப் பெயர் சொல்லி அழைப்பது என்ன வகையான  திமிர். அது மட்டுமல்ல,இந்த பாண்டே ஒரு காலத்தில் விநாயக சதுர்த்தியை சென்னை பிரஸ் கிளப்பில் நடத்தியவரும் கூடத்தான்."


சென்னை பிரஸ் கிளப்பில் விநாயகர் சதுர்த்தி கொண்டாடும்
ரங்கராஜ் பாண்டே,பாரதி தமிழன்


பார்த்தசாரதி,"ஆமாம், நல்லா ஞாபகம் இருக்குது. சாதி வெறி ரங்கராஜ் அப்ப பிரஸ் கிளப் இணைச் செயலாளர் பாரதி தமிழன் (எ) பெருமாள் கூடச் சேர்ந்து அதற்கான விதையை முதன் முதலில் ஊன்றியவர். இதனால் விமர்சனம் வரும் என்று நினைத்த பிரஸ் கிளப் நிர்வாகிகள் கண் துடைப்பாக இன்னொரு காரியத்தைச் செய்கிறார்கள்.

அதுவரை ரவீந்திரதாஸ் தான் ரம்ஜான் விழாவைத் தனது சங்கம் சார்பாக உரிய வாடகை கொடுத்து பிரஸ் கிளப்பில் நடத்தி வந்தார். விநாயகர் சதுர்த்தி கொண்டாட முடிவெடுத்த பிரஸ் கிளப் நிர்வாகிகள், ரவீந்திர தாசுக்கு ரம்ஜான் விழாவைக் கொண்டாட இடம் கொடுக்காமல்,விநாயகர் சதுர்த்திக்கு இரண்டு நாள் முன்பு ரம்ஜானையும் பெயருக்கு கொண்டடினார்கள்.

தொடர்ந்து விநாயகர் சதுர்த்தியை கொண்டாடி பிரஸ் கிளப்பில் ஆரம்பித்து வைத்தவர்கள் தான் இவர்கள்.இப்படித் திட்டமிட்டு இந்துத்துவ வெறியை வளர்ப்பதில் முனைப்பாய் இருந்த ஒரு நபரிடம் வேறு எதை எதிர்பார்க்க முடியும்..?

இன்னும் சொல்லப்போனால் பிரஸ் கிளப்பில் நடைபெற்ற ஒரு நிகழ்ச்சியில் கூடங்குளம் அணு உலை தொடர்பில் மூத்த பத்திரிகையாளர் ஞாநி தினமலரை விமர்சித்தார் என்பதற்காய் அப்பொழுது அங்கு வந்திருந்த இந்த‌ ரங்கராஜ், ஞாநியையும் அணு உலை எதிர்ப்பாளர்களையும்  தரக்குறைவாய் பேசிய‌வர்.

video


இப்படிப்பட்ட ஒரு நபருக்குத் தான் இப்ப 'தந்தி டிவி'யில் உயர்ந்த இடம் கிடைச்சிருக்கு. தன் உடன் பணியாற்றி பலரைக் காலி செய்த சாதி வெறியர், இன்னொரு பக்கம் தந்தியின் போட்டி நிறுவனமான தினமலருக்கு நெருக்கமாக இருக்காருன்னும் சொல்றாங்க. பாண்டேகள் எப்பொழுதும் திருந்தப் போவதில்லை,தந்தி நிறுவனத்துக்கு தான் புத்தி வரணும்."

"வேலை செய்யும் சொந்த சாதிக்காரனின் திறமையைச் சுரண்டியும் தமிழ் இன அடையாளத்தோடும் வளர்ந்த தந்தி  நிறுவனம் இப்ப எங்கிருந்தோ வந்த பீகார்  தற்குறிக்கும்,மலையாளிக்கும் லட்சங்களைக் கொட்டிக் கொடுத்து 'தந்தி டிவி'யில் வேலைக்கு வைத்திருக்கிறது "அன்வர் ஆதங்கப்பட்டார்.

பெஞ்சமின் பாக்ஸ் மேட்டரைச் சொல்ல ஆரம்பித்தார்."இதே மாதிரி தான் சில வருடங்கள் முன்னாடி,வலம்புரி ஜானின் 'தாய்' பத்திரிகையில் ஹேமா ஆனந்த  தீர்த்தன் என்னும் எழுத்தாளர் நேர்காணல். நேர்காணல் எந்த பிரச்சனையும் இல்லாமல் முடிந்தது.

ஆனால் அச்சில் வரும் பொழுது அவரது ஒவ்வொரு பதிலுக்கும் பின்பு அடைப்புக்குறியில் நக்கலும் கிண்டலுமான தொனியில்  நேர்காணலை எடுத்த உதவி ஆசிரியர் தன‌து கருத்தை இடைச்செருகலாய்ச் சொல்லியிருந்தார்.



இதைப் படித்த எழுத்தாளர் கொதித்து விட்டார்,வலம்புரிஜானுக்கு நீண்ட கடிதம் எழுதினார்."உங்கள் பத்திரிகையின் உத‌வி ஆசிரியர்,இந்த கிண்டல் குறிப்பை நேர்காண‌லின் பொழுதே சொல்லி எனது பதிலை வாங்கியிருக்கலாமே..? அலுவலகம் சென்ற பின் எனது ஒப்புதல் இல்லாமல்அவரது கருத்தை இணைத்த‌து தவறு "என்று எழுதியிருந்தார்.

இதைப் படித்த வலம்புரிஜான் அடுத்த இதழில் அதற்கு வருத்தம் தெரிவித்திருந்தார்.

"வலம்புரிஜானிடம் இருக்கும் நேர்மை தந்தி டிவியிடம் இல்லை என்பது தான் உண்மை "பார்த்தசாரதி குறுக்கிட்டார்.

அது சரி 'தாய்' இதழுக்காய் நேர்காண‌ல் எடுத்தது யார் தெரியுமா..? அவர் இப்ப பிரபல திரைப்பட பாடலாசிரியர்.சில காலத்துக்கு முன்பு உச்சத்தில் இருந்தவர். இப்பவும் முகநூலில் ஆக்டிவ்வா இருக்கார். "பெஞ்சமின் பழைய நினைவுகளைப் பகிர்ந்து கொண்டார்.
**

"தந்தி டிவி குறித்துப் பார்த்தோம்.ஆனால் 'தினத்தந்தி' செய்தி போடவில்லை என்பதனாலே புதுசா ஒரு நாளிதழ் வருது தெரியுமா..?  ரவிக்குமார்

அப்படியா..?

ஆமாம். புரட்சிப்புயல் வைகோ தொடங்குகிறார். 'தினத்தந்தி' தனது கட்சியின் செய்தியைப் போடுவது இல்லை என்பதால் வெளிநாட்டில் வாழும் ஈழத்தமிழர் ஒருத்தர் துட்டு கொடுக்க புது நாளிதழ் ஆரம்பிக்க இருக்குறார். 70 கோடி ரூபாய் முதலீடு செய்யத் தயாராய் இருப்பதாய் அவருக்கு நெருக்கமான வட்டாரத்தில் சொல்லிக்கிறாங்க.

புகைப்படம் நன்றி.திரு.சுந்தரராஜன் முகநூல் பக்கம்


"ம். வேலை செய்யும் பத்திரிகையாளர்களுக்கு நல்ல சம்பளம் கொடுத்தால்  வைகோ தொடங்கும் நாளிதழ் வளரட்டும் என வாழ்த்துவோம்." பெஞ்சமின்
**


அன்வர் அடுத்த செய்தியை ஆரம்பித்து வைத்தார்.

" வேந்தர் பச்சமுத்து தனது நோக்கத்தை தொடர்ச்சியா வென்றெடுத்துக் கொண்டு வருகிறார் பார்த்தீர்களா..?"

"புரியலை. தெளிவாச் சொல்லுங்க.அவர் காட்டில் எப்பவும் ஜெயம் தான்,அவருக்கென்ன குறைச்சல்..?"

"கல்வியை கடைச் சரக்காக்கி பல்லாயிரம் கோடியை குறுக்கு வழியில் ஈட்டிய பாரிமுத்து அதனை அரசியல்,ஊடகம்  உட்பட பல்வேறு துறைகளில் முதலீடு செய்தார். ஊடகம் மூலம் தனது நிறுவனத்துக்கு பலவகை ஆதாயம் கிட்டும் என்பதும் தனக்கு எதிராய் எழும் எதிர்ப்புக்களை முனை மழுங்கச் செய்ய முடியும் என்பதும் அதில் முக்கியக் கணக்கு.  'புதிய தலைமுறை,''புது யுகம்,' 'வேந்தர்' போன்ற தொலைக்காட்சிகள் எல்லாம் மேற்கண்ட சூத்திரத்தின் விளைவு தான்.

தொலைக்காட்சிகள் உருவான பின்பு  பச்சமுத்துவின் கல்விக்கொள்ளை,அரசியல் மற்றும் திரைத்துறையில் அவரது ஆதிக்கத்துக்கு எதிரான எதிர்ப்போ, மிரட்டலோ,பிளாக்மெயிலோ தமிழ்நாட்டில் பெரிய அளவில் நேரடியாகவும் மறைமுகமாகவும் அரசியல்வாதிகளிடம் இருந்தோ,பிற இயக்கங்களிடமிருந்தோ இல்லை என்பதை உறுதியாகச் சொல்ல முடியும். இன்னும் சொல்லப்போனால் அனைத்துப் பிரிவினரும் அவரிடம் அடங்கியும் பம்மியும் தான் சென்று கொண்டிருக்கிறார்கள்.

"ம். அதுக்குத் தானே ஆரம்பிச்சது, அந்த பட்டியலில் எதும் அப்டேட் இருக்கா..? " ரவிக்குமார் ஆர்வம் காட்டினார்.

சுற்றுச்சூழலைக் காப்பதற்காய் அவதரித்ததாய் கட்டமைக்கப்ப‌டுகிற  'பூவுலகின் நண்பர்கள்' என்னும் தன்னார்வத் தொண்டு நிறுவனம்,சில வாரங்களுக்கு முன்பு சென்னையில் ஒரு'பொழுதுகள் ஆறு'  நிகழ்ச்சியை பெரிய அளவில் விளம்பரத்துடன் நடத்தியது. அந்த நிகழ்ச்சிக்கு முக்கிய ஸ்பான்சர் வேந்தர் பச்சமுத்து தான்.

 என்.ஜி.ஓ.நிகழ்ச்சியில் பிரம்மாண்டமாய் வேந்தர் லோகோ தான் மின்னியது. அனைவரும் அதற்கு முன் நின்று தான் உரை நிகழ்த்தினார்கள்.

"ஒ.அப்படியா..? பச்சமுத்து ஆக்கிரமிப்பு பேர்வழியாச்சே..? அரசு புறம்போக்கு நிலம்,ஏரி என எதையும் விட்டு வைக்க மாட்டாரே..? இன்னும் சொல்லப்போனால் அவரது காட்டாங்கொளத்தூர் சாம்ராஜ்யம் சுற்றுச்சூழல்,வனப்பாதுகாப்பு,தீயணைப்புத்துறை விதிமுறைகள் எல்லாவற்றையும் காலில் மிதித்தும் காற்றில் பறக்க விட்டும் தானே உருவாக்கப்ப‌ட்டது. இவ்வளவு ஏன் காட்டாங்கொளத்தூர் ஏரியே இவர்களால் பெரிய அளவில் ஆக்கிரமிக்கப்பட்டதே..? அரசு கூட கண்துடைப்பாக ஒன்றிரண்டு இடங்களில் புறம்போக்கு ஆக்கிரமிப்பையும் அகற்றியுள்ளதே.?




எத்தனையோ மக்கள் திரள் அமைப்புகள் இதற்காக தங்களால் முடிந்த அளவு போராடி வருகின்றார்களே..? அவர்களுடன் அல்லவா இவர்கள் கை கோர்க்க வேண்டும்..?

நிறுத்துங்க...இப்படியே போனா நிற்காது.



"சரி தான். ஏரியையும் சுற்றுச்சூழலையும் காக்க வேண்டிய சூழல் அமைப்பு, ஐந்திணை, முந்நீர் விழவு, ஐம்பூதம் என தமிழ்ச் சூழலியல் பண்பாட்டில் நடைபெறும் சிதைவுகள் குறித்து எச்சரிக்கும் நிகழ்ச்சிக்கு அதற்கு முற்றிலும் எதிரான நபரிடம் கைகட்டி நின்னு உதவி வாங்கியிருக்குது.



இதுக்கு எப்படி பதில் விசுவாசத்தை செலுத்தப் போறாங்கன்னு தெரியலை. இவங்க சூழலைக் காக்கும் லட்சணம் இது தானா..? பச்சமுத்துவிடமே இந்தப் பம்மு பம்முனா இதை விட பல மடங்கு வலிமை வாய்ந்த அரசு அமைப்புகளை எப்படித்தான் எதிர்ப்பார்களோ..? என்ன நிலை என்று தெரியவில்லையே..?"

"எது எப்படியோ, ஊடக அதிபர் வேந்தர் கணக்கு எப்பவும் தப்பாது" ரவிக்குமார் சிரித்தபடியே சொன்னார்.
**



"விகடன் செய்தி எதுவும் இல்லையா..? "அன்வர்

"ஆ.விகடனில் வேலை பார்க்குறவங்க கடுமையான மன அழுத்தத்தில் இருக்காங்களாம் "

"ஏன் என்னாச்சு..? "



"அது ஒண்ணுமில்லை.ஏற்கனவே அங்கு கடுமையான வேலைப்பளு. குமுதத்தில் 20 க்கும் மேற்பட்டவங்க பார்க்குற வேலையை இங்க ஆறு பேரு தலையில் கட்டியிருந்தாங்க. வேலைத் தன்மையும் மிக அதிகம். அதிலும் இப்ப கலீல் ராஜா தப்பிச்சு விளம்பர நிறுவனத்துல சேர்ந்துட்டார். ஆனாலும் நிறுவனமோ புதிதாய் ஆள் எடுக்கும்  விஷயத்தில் அரசாங்கம் மாதிரி மெத்தனப்போக்குடன் செயல்படுது. வேலையில் இருப்பவங்க பல்லைக் கடிச்சுக்கிட்டே சமாளிச்சுக்கிட்டிருக்காங்க. இதே நிலை நீடித்தால் விகடனில் வேலை பார்ப்பவங்க மன அழுத்தம் தாங்க முடியாம கஷ்டப்பட‌ வாய்ப்பு இருக்கு " பெஞ்சமின்

ஆசிரியர் ரா.கண்ண‌ன் கவனிப்பாரான்னு பார்ப்போம்.
**
"ஜு.வி.யில் கொங்கு நாடு மக்கள் தேசியக் கட்சி  ஈஸ்வரன் பேட்டி பார்த்தீர்களா ?" பார்த்தசாரதி

" ஆமாம். எதுவும் சம்பந்தம் இல்லாமல் இருக்குது. "





பார்த்தசாரதி தொடர்ந்தார்."இலங்கை சுற்றுப்பயணம் போய் வந்தது அவர் கட்சியில் ஒரு குழு. அதன் தலைவர் ஈஸ்வரன் இலங்கைக்குச் செல்லவில்லை. இவங்க பேட்டி எடுக்க முடிவு செய்தார்கள் என்றால் இலங்கைக்குச் சென்ற‌அந்தக் குழுவினரின் நேர்காணலை, திருப்பூர் நிருபரை விட்டு வாங்கிப் போட்டிருக்கலாம். இலங்கைக்குச் செல்லாமல் திருப்பூரில் இருக்கும் அதன் தலைவரிடம் இலங்கை சுற்றுப்பயண அனுபவங்களை நேர்காணல் செய்கிறார் கனிஷ்கா என்ற சூர்யா என்ற பாலகிஷன்,சென்னை அலுவலகத்தில் அமர்ந்து கொண்டு இதைச் செய்கிறார்.

"கொடுமையா இருக்குது. படிக்குற வாசகனை எவ்வளவு மடையனா நினைக்கிறாங்க. ஒரு நேர்காணலை யாரிடம் எடுக்கணும்,யார் செய்யணும் என்னும் அரிச்சுவடி கூடத் தெரியாத பாலகிஷன் சிறப்புச் செய்தியாளர் என்பது தான் கொடுமை "அன்வர் முடித்து வைத்தார்.

**


" 'ZEE tamil' தொலைக்காட்சியில் ஏதோ அடிதடின்னு தகவல் என்ன நடந்தது அங்கே..? "

"திரைப்பட சாட்டிலைட் உரிமை தொடர்பா பஞ்சாயத்து. வெள்ளக்காரதுரை என்னும் சிவாஜி பேரன் ப‌டத்தை ஹெவியான தொகை கொடுத்து வாங்கினாங்க. பிசினஸ் ஹெட்  ஈஸ்வர் என்பவர் தான்  டீல் பேசி முடிச்சார். ஒப்பந்தம் கையெழுத்தாகும் முன் இடையில் கொஞ்சம் பண‌மும் கணக்கில் வராமல் தொலைக்காட்சி நிர்வாகிகளுக்கு கை மாறியிருக்குது. படத்தயாரிப்புத் தரப்பில் அன்பான மதுரைக்கார கந்துவட்டி பார்ட்டி தான் டீல் பேசியவர்.

இதை யாரோ டெல்லி ஆபிசுக்கு போட்டுக் கொடுத்துட்டாங்க,உடனே அவங்க இங்க போன் பண்ணி படத்தை வாங்க வேண்டாமுன்னு சொல்லிட்டாங்க. கை நீட்டிக் காசு வாங்கிய பார்ட்டியால பணத்தையும் திருப்பித் தர முடியலை.ஒப்பந்தமும் போட முடியலை"

"அப்புறம் என்னாச்சு..?"

"அன்பானவர் வெகுண்டெழுந்து ஈஸ்வரை அலுவலகம் புகுந்து புரட்டி எடுத்துட்டார்.இப்ப பார்ட்டி ஆஸ்பத்திரிக்கு லட்சக்கணக்கில் செலவழித்தும் இன்னும் ஒத்தடம் தேவைப்படுதாம்."

"ம்ம்."
**
" 'தின இதழ்' பஞ்சாயத்து என்னாச்சு.., சம்பளம் வரலைன்னு எழுதியிருந்தோமே..? சம்பளம் வந்ததா..? இல்லை சாகும் வரை உண்ணாவிரதம் இருந்தார்களா..? " பெஞ்சமின்

"நாம் பதிவு எழுதிய மறுநாள் எல்லோருக்கும் சம்பளம் வந்துடுச்சு. ஆனாலும் வழக்கம் போல தொடர்ந்து சம்பளபாக்கியை வைத்துக்கொண்டு தான் இருக்காங்களாம்"அன்வர்

"தன‌து கல்லூரியில் படிக்கும் மாணவர்களிடம் நன்கொடையையும் ஒரு வருட கட்டண‌த்தையும் முன்கூட்டியே வாங்கும் முதலாளி பத்திரிகையில் வேலை செய்தவனுக்கு சமபளம் கொடுக்க மனசு வரல்லை. இவங்க எல்லாம் பத்திரிகை நடத்தலைன்னு யார் அழுதா." ரவிக்குமார்
**
 " 'சிகப்பு நாடா' பத்திரிகையில் இப்ப கதிர்வேல் சார் இல்லையாமே..?"

ஆமாம்,அப்படி ஒரு பத்திரிகை வருவதே நிறையப்பேருக்குத் தெரியாது. இப்ப ஏழுமலை சார் தான் அனைத்தையும் பார்த்துக்கொள்கிறார். அது மட்டுமல்லாமல் இதை நக்கல் பண்னி 'தினகரன்' சுரேஷ் முகநூலில் நிலைச்செய்தி எழுதியதையும் பார்த்தேன்.இதுக்காக சுரேஷை மலைமோகன் கலாய்ச்சிருந்தார்.கதிர்வேல் சாரிடம் விமர்சனம் உண்டு.ஆனா அதுக்காக‌...சுரேஷ் போன்றவர்கள் இப்படிப் பேசுவதை என்ன செய்வது..?


 "ஆர்.எம்.ஆர்.அல்லக்கை சுரேஷ் இது மாதிரி எழுதுவது ஆச்சரியம் இல்லை தான்."
**

"'தமிழக அரசியல்' வாரமிருமுறை இதழில் மாதக்கணக்கில் சம்பளம் தரல்லைன்னு புகார் வருது.அதையும் விசாரித்து எழுதுங்க"-என்ற அன்வரின் கோரிக்கையோடு அன்றைய சந்திப்பு முடிந்தது.


Sunday, 29 March 2015

தினகரன் ஊழியர்களா ..? கொத்தடிமைகளா..?



டக உலகில் எத்தனையோ தொழிலாளர் விரோதிகள் உண்டு. ஆனால் அவர்கள் அத்தனை பேரும் தினகரன் முதலாளிகள் கேடி பிரதர்சிடமும்,அவருக்கு கங்காணி வேலை பார்க்கும் ஆர்.எம்.ஆரிடமும் பிச்சை வாங்க வேண்டும்.

உழைக்கும் பத்திரிகையாளர்கள் மற்றும் இதர‌ ஊழியர்களின் ஊதியம் குறித்த 'ம‌ஜிதியா கமிட்டி'யின் பரிந்துரைகளை தினமலர்,தினத்தந்தி உட்பட பெரும்பாலான பத்திரிகைகள் ஒரு வருடத்துக்கு முன்பே (பெயரளவிலாவது) அமல் படுத்தி விட்டனர்.

ஆனால் இன்று வரை அதை அமல்படுத்தவும்,அது குறித்து யோசிக்கவும் மறுக்கும் நிர்வாகம் தினகரன் மட்டுமே...!
இது எவ்வளவு பெரிய தொழிலாளர் விரோதப்போக்கு ? மோசடி..? இவர்கள் தான் ஊரில் இருப்பவர்கள் தவறுகளை எல்லாம் சுட்டிக் காட்டிச் செய்தி வெளியிடும் உத்தமர்கள்.

மத்தியிலும் மாநிலத்திலும் ஆட்சியில் இல்லாமல் நீதிமன்றத்தில் ஆஜர் ஆவதிலும்,தலைமறைவிலும்,பயத்தில் ஓடி ஒளியும் நிலையிலேயே, தன் கீழ் வேலை பார்க்கும் ஆயிரக்கணக்கான பத்திரிகையாளர்களின் வயிற்றை அடித்து இவ்வளவு பெரிய மோசடியை பகிரங்கமாய்ச் செய்கிறார்கள் என்றால் ஆட்சியில் இருக்கும் பொழுது இவர்கள் எப்படி நடதிருப்பார்கள் என்று யோசித்துப் பாருங்கள். எச்.ஆர்.சாந்தியிடம் யாரும் இது குறித்துக் கேட்டால் பெரும்பாலான நேரத்தில் மவுனமும் சில நேரத்தில் சிரிப்பு மட்டுமே பதிலாய் வருகிறது. எடிட்டர் ஆர்.எம்.ஆரை அவரால் பலனடையும் விசுவாசிகள் மட்டுமே பார்க்க முடிகிறது.

இது மட்டுமல்ல தினகரனின் சுரண்டலுக்கு இன்னொரு எடுத்துக்காட்டு.

ஒவ்வொரு வருடமும் வழங்கும் ஊதிய உயர்வை இரண்டு வருடங்களாக வழங்கவில்லை. ஏப்ரல் 2013 இல் வழங்கப்ப‌ட வேண்டிய ஊதிய உயர்வை ஜூன் 2013 இல் தான் வழங்கினார்கள். (அந்த இரண்டு மாத ஊதிய உயர்வையும் சுரண்டி விட்டார்கள்.) அதன் பின் 2014 ஆம் ஆண்டு வழங்கப்பட வேண்டிய ஊதிய உயர்வு வழங்கப்படவே இல்லை. இப்பொழுதோ 2015 ஏப்ரல் வந்து விட்டது. இந்த நிலையில் இந்த வருடமும் வழங்கும் எண்ணம் இருப்பதாகத் தெரியவில்லை.

எந்தவொரு நிறுவனமாவது இப்படி ஒரு தொழிலாளர் விரோதப்போக்குடன் இருக்குமா என்று தெரியவில்லை. இதனை வலியுறுத்தி வீதிக்கு வந்து போராடும் நிலையில் தொழிலாளர்கள் இல்லை. இந்நிலையில் தினகரன் நிர்வாகம் கைமாறும் என்ற பேச்சு நாடு முழுவதும் இருப்பதால் வேலை செய்பவ‌ர்களிடையே இயல்பாகவே  பதற்ற‌மும்,மன அழுத்தமும் வந்திருக்கிறது.

எப்பொழுது ஊதிய உயர்வு..? எப்பொழுது மஜிதியா கமிட்டி பரிந்துரைகளை அமல்படுத்துவார்கள்..?

எப்பொழுதும் சுரண்டியே ஆசியாவின் பெரிய பணக்காரக் குடும்பம்,குறைந்தபட்சம்  தனது கீழ் வேலை பார்க்கும் பத்திரிகையாளர்களைச் சுரண்டி  வயிறு வளர்ப்பதை எப்பொழுது நிறுத்தும்..?

 2015 ஏப்ரலிலாவது ஊதிய உயர்வும் மஜிதியா கமிட்டி பரிந்துரையும் அமல்படுத்தப்படுமா..? 

தொடர்பு செய்தி




ட்டப் பகலில் ஒருத்தன் கிட்டயிருந்து எட்டரை லட்சத்தை வழிப்பறி பண்ணிட்டா எனச் சொல்லிய படியே பீட்டர் மாமா வந்தார்.

அப்படியா என்னன்னா சொல்றேள்,உடம்பை வருத்திக்காதீங்க முதல்ல கொஞ்சம் மோர் குடிங்க

இப்ப சொல்லுங்க.யார் கிட்டயிருந்து வழிப்பறி பண்ணிட்டாள்../போலிசுக்கு போறது தான்ன‌

நான் சொல்ற‌தைக்கேளு குறுக்க பேசாத,உன்னாலயே எனக்கு பிரஷர் அதிகமாயிடுது.

ம்ம்.எல்லாப் பழியையும் என் மேல போடுங்க..சொல்லுங்க‌

திருச்சியில் சங்கம் அப்படின்னு ஒரு ஹோட்டல் இருக்குது,அந்த முதலாளி ஒரு பெரிய தப்புப் பண்ணிட்டான்,அது எப்படியோ திருச்சியில் இருக்குற நம்ம பத்திரிகை மேனேஜருக்குத் தெரிஞ்சுடுச்சு. உடனே அவா சங்கம் ஓட்டல் முதலாளிக்கு போன் போட்டார்.

அதானே.. நம்ம ஆளுங்களா கொக்கா..? மறுநாள் அவாளைக் கண்டிச்சு எட்டு காலம் செய்தி போட்டு நாறடிச்சிருப்பாளே..?

செத்த நிப்பாட்டுறியா..? குறுக்க பேசாதன்னு தானே சொன்னேன்.

மாமி அமைதியானார்.

போன் போட்டு பேசின‌ மேனேஜர், நேர்லயே போய்ட்டார்.அங்க போய் அவாளை மிரட்டி எட்டரை லட்சம் வாங்கிட்டு,உனக்கு எதிரா ஒரு செய்தியும் வராது அப்படின்னு சொல்லிக் காபி குடிச்சுட்டு வந்துட்டார்.

அடப்பாவி எட்டரை லட்சம் வழிப்பறியா..?

பொறு.இது எப்படியோ கச்சேரி ரோட்டுல உட்கார்ந்துருக்குற எம்.டி.ரமேஷூக்கு தெரிஞ்சிடுச்சு. உடனே திருச்சி மேனேஜருக்கு போன் போட்டு மறுநாள் கிளம்பி சென்னை ஆபிஸ் வரச் சொன்னார்.

அதானே..? தப்பு பண்றவா ரமேஷ் கிட்டயிருந்து தப்பிக்க முடியாது.  பகவான் ரமேஷ் மூலமா திருச்சி மேனேஜரைத் தண்டிப்பார்.

முறைத்துப் பார்த்தார் பீட்டர் மாமா.அமைதியானார் மாமி.

வந்தவுடன் நாக்கைப் பிடுங்குற மாதிரி ரமேஷ் கேள்வி கேட்டார்,எனக்கே தெரியாம பிராடுத்தனமா? நான் எத்தனை பேரு கண்ணுல விரல் விட்டு ஆட்டியிருப்பேன்,உன்னை வேலைக்குச் சேர்த்த என்னையே ஏமாத்துறியா..?  என் கிட்ட சொல்லியிருந்தா உனக்கு கொஞ்சம் பங்கு கொடுத்துருப்பேன்.இப்ப ஒரு பைசா கூட உனக்கு கிடையாது. ஒழுங்கா மரியாதையா அந்த எட்டரை லட்சத்தை வச்சிட்டுப் போ,இனிமேலாச்சும் சொல்லிட்டுச் செய் எனச் சொல்லி மொத்த‌ பணத்தையும் வாங்கிக் கொண்டு அனுப்பிட்டார்.

மாமி இப்பொழுது மயக்கமாகி விட்டார்.


Friday, 27 March 2015

கருத்துரிமை சிங்கங்களும் கடந்த கால அசிங்கங்களும்...!


'மாற்றத்திற்கான ஊடகவியலாளர்கள் மய்யம்'  என்னும் அமைப்பு வரும் ஞாயிறு அன்று கருத்து சுதந்திர ஒடுக்குமுறைகளுக்கு எதிரான கூட்டம் என்னும் தலைப்பில் ஒரு நிகழ்வை ஒருங்கிணைத்துள்ளது.

தந்தி டிவி,கருத்துரிமை,ஒடுக்குமுறை,ஆர்ப்பாட்டம்,தினகரன் எரிப்பு,அழகிரி




அது தொடர்பாய் சிறு பதிவு.

அழைப்பிதழில் நிகழ்ச்சி எங்கு நடக்கிறது,யார் யார் கலந்து கொள்கிறார்கள்,எந்த அமைப்புகள் இணைந்து கொள்கிறார்கள் என்று மிகத் தெளிவாக அச்சிட்டிருக்கிறார்கள். ஆனால் கருத்து சுதந்திரத்தை காக்க கூட்டம் நடத்தும் அளவுக்கு இப்பொழுது என்ன தாக்குதல்கள் நடைபெற்றன,யார் யார் தாக்குதலுக்கு உள்ளானார்கள்..? யாரைக் கண்டித்து இந்தக் கூட்டம் போன்ற அடிப்படை விபரம் எதுவும் இல்லை.

சமீபத்தில் நடைபெற்ற தாக்குதலை வெளிப்படையாய்ச் சொல்ல என்ன தயக்கம்..? டிபன்பாக்ஸில் வெடிபொருளை நிரப்பி வீசி விட்டுச் சென்ற கும்பலே வெளிப்படையாய்ச் செய்கையில் அதைக் கண்டித்துக் கூட்டம் நடத்தும் நீங்கள் ஏன் பூசி மெழுகி பூடக மொழியில் யாருக்கும் புரியாமல் அறைகூவல் விடுக்கிறார்கள்..?

அடுத்ததாய் கலந்து கொள்ளும் கருத்துரிமை சிங்கங்கள் குறித்து..

சிறப்புரை-மூத்த பத்திரிகையாளர் என்.ராம்

என்.ராமின் கருத்துரிமைக்கு நாம் ஒரு சிறு எடுத்துக்காட்டு தருகிறோம்.

மதுரையில் தினகரன் ஊழியர்கள் மூவர் அஞ்சாநெஞ்சனின் கும்பலால் எரித்துக் கொல்லப்பட்ட பொழுது அதைக் கண்டித்து மறுநாள் மிக கடுமையான வார்த்தைகளில் இந்து நாளிதழில் தலையங்கம் எழுதினார் எடிட்டர் என்.ராம்.
மறுநாள் ரிப்போர்ட்டர் கில்டு வளாகத்தில் மூவர் எரிப்பைக் கண்டித்தும்,இதற்கு எவ்வாறு எதிர்வினை ஆற்றுவது என்றும் அவசரக் கூட்டம்.

உண்மையான பத்திரிகையாளர்கள் முதற் கொண்டு பிளாக்மெயில் பத்திரிகையாளர்கள் வரைக்கும் லெட்டர் பேடு சங்க பிரதிநிதிகள் தொடங்கி பாரம்பரிய சங்கங்கள் வரைக்கும் அனைவரும் உணர்ச்சிமயத்துடன் குழுமி இருக்கின்றனர். எடிட்டர் என்.ராம்,தினகரன் சென்னை அலுவலகம் தொடங்கி டி.ஜி.பி.அலுவலகம் வரைக்கும் அனைத்து பத்திரிகையாளர்களும் ஊர்வலம் செல்வோம்,டி.ஜி.பி.யைச் சந்தித்து மனு கொடுப்போம்,அணி திரளுவோம் என வீராவேசமாய் உரையாற்றுகிறார். அனைவரும் சம்மதிக்கின்றனர்.

ஆனால் தினகரன் அலுவல‌கம் அருகில் டுபாக்கூர் பத்திரிகையாளர்கள் கூட வந்த நிலையில் என்.ராம் வரவில்லை. தொலைபேசி எடுக்கப் ப‌டவில்லை. ஊர்வலமும் நடக்கவில்லை.

முரசொலி போட்டோ கிராபராய் மாறிய 'தி இந்து' எடிட்டர் என்.ராம்.

கடைசியில் ஒரு பத்திரிகையாளர் சொல்கிறார். 'தி இந்து' பாணியில் sources said என வைத்துக் கொள்ளுங்களேன்.

கோபாலபுரத்தில் இருந்து தொலைபேசி அழைப்பு வந்ததாகவும்,கரகரத்த குரலில்," ஏன்யா உன் குடும்பத்துல பிரச்சனை வந்தப்ப உனக்கு எவ்வளவு உதவி செய்திருக்கேன்,அதையெல்லாம் மறந்துட்டு என் குடும்பத்தை அசிங்கப்படுத்த ஊர்வலம் போறியா ? போய்ட்டு வந்து என்னை எப்படித் திட்டுனேன்னு வந்து சொல்லுய்யா" என சொல்லிவிட்டு தொலைபேசி வைக்கப்ப‌ட்டதாகவும், என்.ராம்.அதன்பின்  எப்படி எட்டிப் பார்ப்பார் எனவும் மனம் வெதும்பி கச்சேரி சாலை மதிய வெயிலில் பகிர்ந்து கொண்டார்.

அன்று தனது சுயநலத்துக்காய் மூவரின் கொலைக்கு நீதி கேட்கும் ஊர்வலத்துக்கே விடுமுறை விட்ட என்.ராம் இன்று கருத்து சுதந்திர ஒடுக்குமுறைகளுக்கு எதிராய் உரையாற்றப் போகிறாராம். உங்கள் நிகழ்ச்சி நடக்கும் பொழுது அவருக்கு எங்கிருந்தும் தொலைபேசி வராமல் பார்த்துக் கொள்ளுங்கள்.

நீங்கள் அழைத்ததைப் பார்த்து என்.ராம் கண்டிப்பாய் வாயால் சிரித்திருக்க மாட்டார்.
*
அடுத்ததாக மு.க.ஸ்டாலின்


எரியும் தினகரன் மதுரை அலுவலகம்


மதுரையில் தினகரனின் மூன்று ஊழியர்கள் கொலையின் சூத்திர‌தாரியான‌ 'அஞ்சாநெஞ்சரின்' உடன்பிறந்த தம்பி தான் மு.க.ஸ்டாலின் அவரது அப்பா மு.கருணாநிதி தான் அப்பொழுதைய முதல்வர்.

மு.க.அழகிரி வழக்கிலிருந்து அழகிரி விடுவிக்கப்பட்டு விட்டாரே என எதிர்வினா எழுப்பலாம். இந்தியாவில் அரசியல் பின்னணி உள்ள வழக்குகள் எப்படி விசாரிக்கப்படுகின்றன..? அதன் குற்றவியல் விசாரணை எப்படி நடைபெறுகிறது..? எப்படி குற்றவாளிகள் தப்பிக்கிறார்கள்..?  என்பது மாற்றத்திற்கான ஊடகவியலாளர்களுக்கு தெரியவில்லையா என்ன..?
இது கூடத் தெரியாமல் நீங்களெல்லாம் என்ன பத்திரிகையாளர்கள்..?


மூவரின் உயிரைப் பறித்த கும்பலுக்கு ஆதரவும் பாதுகாப்பும் தந்து தப்பிக்க வைக்க, உங்கள் நிகழ்ச்சியில் கண்டன உரை ஆற்றும் மு.க..ஸ்டாலினின் குடும்பமும் அவரது கட்சியும் பங்காற்றவில்லை என உங்களால் அறிக்கை வெளியிட முடியுமா..? அந்த பங்காளி கருத்து சுதந்திர ஒடுக்குமுறைகளுக்கு எதிராக உரையாற்றுகிறார்.

தயவு செய்து அடுத்த கூட்டத்துக்கு அஞ்சாநெஞ்சன் அழகிரியையும் அட்டாக் பாண்டியையும் கூப்பிட்டு விடாதீர்கள்.

ஈ.வெ.கி.ச.இளங்கோவன் & ஜி.கே.வாசன்.

கருத்து சுதந்திரத்தை மிக மோசமான முறையில் ஒடுக்கிய தகவல் தொழில் நுட்பச் சட்ப பிரிவு 66 ஏ வை கடந்த காங்கிரஸ் ஆட்சி தான் அமல்படுத்தியது. இதில் எத்தனையோ பேர் பாதிக்கப்ப‌ட்டிருக்கிறார்கள். மேற்கண்ட இருவரும் அங்கம் வகித்த இந்திரா காங்கிரஸ் கட்சி தான் இதைச் செய்தது. மேலும் இந்த சட்ட திருத்தத்தில்  தி.மு.க. அமைச்சர் ஆ.ராசாவின் பங்கு குறித்து அப்பொழுதைய சட்ட அமைச்சர் பரத்வாஜே கருத்த்து தெரிவித்திருக்கிறார்.இவர்கள் கருத்து சுதந்திர ஒடுக்குமுறைகளுக்கு எதிராய் உரையாற்றுகிறாராம். நல்லாத்தான் இருக்கு.



பால் தாக்கரே செத்துப்போன நிலையில்,அடுத்த கருத்து சுதந்திர 'பாதுகாப்பு' கூட்டத்துக்கு உத்தவ் தாக்கரேவை அழைங்க பாஸ். கல்யாண் ஜூவல்லர்ஸ் புரட்சியை விட உங்க 'புரட்சி' வேகமாய் வந்து விடும் .

ஜி.ராமகிருஷ்ணன்

தங்கள் கட்சியின் முன்னணி தலைவர் மரணம் குறித்து வினாக்கள் எழுப்பினார்கள் என்னும் ஒரே காரணத்துக்காய் கட்சியின் அடியாள் கும்பலை விட்டு மக்கள் தொலைக்காட்சியில் தாக்குதல் நடத்தியவர்கள் இன்று கருத்துரிமையைக் காக்கப்போகிறார்கள்.

வேஷம் கச்சிதமாத் தான் இருக்குது.
*
மல்லை சத்யா

கொடிய ஒடுக்குமுறைச் சட்டமான பொடாவை மிகத்தீவிரமாய் நாடாளுமன்றத்தில் ஆதரித்த வைகோ வராத நிலையில் அவர் கட்சியின் சார்பில் மல்லை சத்யா வருகை புரிந்திருக்கிறார்.இதுவும் சரியான தேர்வு தான்.
*
விஸ்வரூபம் பிரச்சனையில் கமல்ஹாசனின் 'கருத்து சுதந்திரத்துக்கு' எதிராய் அணிவகுத்து அவர் திரைப்படத்தை வெளியிடாமல் செய்த ஜவாஹிருல்லா,தெஹ்லான் பகவி போன்றோரும் கருத்து சுதந்திர‌த்தைக் காக்க கிளம்பியிருக்கிறார்கள்.

இவர்கள் எல்லாம் சேர்ந்து தான் கருத்துரிமையைக் காக்கப் போகிறார்களாம்.
இந்தக் கூட்டணி அரசியல் கூட்டணியைத் தூக்கிச் சாப்பிடும் அளவுக்கு இருக்கிறது.

இதில் இன்னொரு உள் அரசியலும் இருக்கிறது.

அ.தி.மு.க.,பா.ஜ.க.,பாட்டாளி மக்கள் கட்சி ஆகியன புறக்கணிக்கப்பட்டிருக்கின்றன. அதிமுகவும் பாஜகவும் ஆளுங்கட்சி என்பதால் புறக்கணிப்பது சரியான முடிவு தான். பாட்டாளி மக்கள் கட்சியை ஏன் புறக்கணித்தார்கள் என்று தெரியவில்லை. சாதி ஒழிப்புக்கு எதிரானவர்கள் என்று காரணம் சொல்லலாம்.

வாதத்துக்காய் கேட்கிறோம். மேலே நிகழ்ச்சிக்கு அழைக்கப்ப‌ட்டவர்கள் எல்லாம் சாதியையும் மதவாதத்தையும் உண்மையாய் ஒழிக்கும் நோக்கம் உள்ளவர்களா..?

மல்லை சத்யா சார்ந்துள்ள கட்சித்தலைவர் வைகோ வின் சாதி 'ஒழிப்பின்' லட்சணம் குறித்து கலிங்கப்பட்டி சுற்று வட்டாரத்தில் இருக்கும்  40 ஜில்லா தலித்துகளிடம் கேட்டு விட்டு முடிவுக்கு வாருங்கள்.

ஓரணா கூலி உயர்வு கோரிக்கைக்கு,சவுக்கடியையும் சாணிப்பாலையும், ஈரணா கூலி உயர்வு கோரிக்கைக்கு சவக்குழிக்கு அனுப்பவும் செய்த கபிஸ்தலம் பண்ணையார் மூப்பனாரின் வாரிசு, மேடையில் கருத்துரிமையைக் காக்க கொந்தளிக்கும் பொழுது தைலாபுரம் படையாச்சியும் உங்கள் 'உரிமை'க்காய் முழங்கினால் என்ன தப்பு..?

இதனால்  உங்கள் முற்போக்குச் சாயம் அழிந்து விடவும் நீங்கள் அம்பலப்பட்டுமா விடப்போவீர்கள் .?

இன்னொரு தகவலையும் சொல்கிறார்கள். புதிய தலைமுறை தொலைக்காட்சி மீதான தாக்குதலை ராமதாஸ் கண்டிக்கவில்லையாம்,அதனால் அழைக்கவில்லையாம். அப்படியானால் 'தினத்தந்தி' அலுவலகத்துக்குள் அத்துமீறி செருப்பு வீசிய வைகோ கட்சியை அழைப்பது எப்படிச் சரி..?
****

ன்னும் கேள்விகள் எண்ணற்றவை இருக்கின்றன.

கேட்பதற்கு எங்களிடம் நேரமும் சொல்வதற்கு உங்களிடம் பதிலும் கண்டிப்பாய் இல்லை.

ஆனாலும் தவிர்க்க முடியாமல் சில கேள்விகள்

நாளைய உங்கள் கூட்டத்தில்,இலங்கையில் லசந்தா விக்ரமசிங்கே உட்பட எத்தனையோ பத்திரிகையாளர்கள் கொல்லப்பட்டதற்கும் கருத்து சுதந்திரம் நசுக்கப்பட்டதற்கும்  காரணமான சிங்கள அரசையும் இனவாதத்தையும் 'இந்து' எடிட்டர் என்.ராம்.பகிரங்கமாய் கண்டிப்பாரா..?

மதுரையில்  தினகரன் மூன்று ஊழியர்கள் கொலை வழக்கில் உண்மைக்குற்றவாளிகள் சட்டத்தின் சந்து பொந்துகளின் மூலம்  தப்பித்து விட்டார்கள்,அவர்களைக் கைது செய்ய மத்திய மாநில அரசுகள் நடவடிக்கை எடுக்க வேண்டுமென மு.க்.ஸ்டாலினை பேச வைக்க உங்களால் முடியுமா..? (இத்தனைக்கும் இப்பொழுது அழகிரிக்கும் இவருக்கும் முரண்பாடு இருக்கிறது.)

முந்தைய காங்கிரஸ் அரசால் தகவல் தொழில்நுட்பச் சட்ட‌த்தில் செய்யப்பட்ட 66 ஏ பிரிவு ரத்து செய்யப்பட்ட நிலையில் அதைக்கொண்டு வந்த காங்கிரஸ் அரசையும் தலைவி சோனியாவையும் இளங்கோவன் ஏன் தனிக்கட்சி கண்டிருக்கும் வாசனாவது கண்டிப்பாரா..?

'மக்கள் தொலைக்காட்சி' மீதான தாக்குதலில் ஈடுபட்ட குற்ற‌வாளிகள் சட்டத்தின் முன் நிறுத்தப்பட்டுத் தண்டிக்கப்ப‌ட வேண்டும் என ஜி.ராமகிருஷ்ணன் பேசுவாரா..?



நேற்று வரை தங்களுக்கு முற்றிலும் எதிராய் இருந்தவர்களுடன் கூட்டுச் சேர்ந்து களத்தில் இறங்குவது சீரழிந்த அரசியல்வாதிகள் செய்யும் வேலை.

நேற்றொரு தலைப்புக்கு வக்காலத்து, இன்று ஒரு தலைப்புக்கு வக்காலத்து வாங்கிப்பேசவும் அரங்கில் இருந்த பார்வையாளர்களை வாய்விட்டு சிரிக்க வைக்க எதை வேண்டுமானாலும் பேச‌வும் இது சிரிப்பு பட்டிமன்றம் அல்ல.

இது பத்திரிகையாளர்களின்கருத்துரிமை சார்ந்த போராட்டம். உண்மையை எந்த இடத்திலும் எப்பொழுதும் உரத்துச் சொல்வதற்குத் தயங்கக் கூடாது.அதிலும் நீங்கள் மாற்றத்திற்கான ஊடகவியலாளர்கள் என்று வேறு பீற்றிக் கொள்கின்றீர்கள். அப்படியானால் எப்படிச் செயல்பட வேண்டும்..?

நமக்காய் உரத்துக் குரல் ஒலிக்கவும்,நம்முடன் இணைந்து போராடவும் யாரைத் தேர்வு செய்ய வேண்டும் என்பதை விடவும் யாரைத் தேர்வு செய்யக்கூடாது என்பதில் அதீத எச்சரிக்கையும் தெளிவும்  தேவை.

நேற்று வரை  பத்திரிகையாளர்களை ஒடுக்கியவன்,ஓட ஓட விரட்டியவன்,கொலை செய்தவன்,முதுகில் குத்தியவன்,எதிரியிடம் காட்டிக் கொடுத்த‌வன் போன்றோர்களுடன் இணைந்து உரிமையைக் காக்க முடிவு செய்வது எந்த விதத்தில் சரி..?

அடுத்த அரசாங்கம் வந்தால் யாருடன் இணைந்து உரிமையைக் காப்பீர்கள்..? புதிய தலைமுறை அலுவலகத்தின் மீது டிபன் பாக்ஸ் குண்டு வீசியவனுடன் இணைந்தா..?

'மாற்றத்திற்கான ஊடகவியலாளர்கள் மய்யம்உருவான மிகக் குறுகிய காலத்தில் உங்களின் தன்முனைப்பும் ஆர்வக்கோளாறும் பளிச்செனத் தெரிகிறது.

உங்கள் அமைப்பின் சார்பில் உண்மையான ஒரு பத்திரிகையாளர் கலந்து கொண்டு ஒற்றைக்குரலாய் ஒலித்துத் தோற்றுப் போனாலும் பரவாயில்லை. கவலை கொள்ளவும் தேவையில்லை.இல்லை இல்லை  நாங்கள் மேற்கண்ட 'போராளிகளுடன்' இணைந்து இணைந்து போராடியே தீருவோம் என   நீங்கள் பிடிவாதமாய் நின்றால் சொல்வதற்கு ஒன்று இருக்கிறது.

என்.ராம்,ஜி.கே.வாசன்,மற்றும் மு.க.ஸ்டாலின் வகையறாக்கள் வாங்கித் தரும் கருத்துரிமை சுதந்திரத்தை சுவாசிப்பதை விடவும் களத்தில்தோற்றுப் போவதையே உண்மையும் நேர்மையும் கொண்ட பத்திரிகையாளன் விரும்புவான்.

நீங்கள் எப்படிப் பட்ட பத்திரிகையாளர்கள் என்பதை முடிவு செய்து கொள்ளுங்கள்.

பாலோ அப்



                        குற்றவாளிகள் வெளியிடும் தீர்ப்பு 

Tuesday, 24 February 2015

நாளிதழ் முதலாளிக்கு எதிராய் ஈரத்துணி கட்டி போராட்டம்...!


வேலை பார்த்தவன் கஞ்சிக்கு வழியில்லாமல் திண்டாட கேக் வெட்டிக் கொண்டாட்டம் ஒரு கேடா ராதா கிருஷ்ணா..?

குறுக்கு வழியில் பல நூறு கோடிகளைக் குவித்த பேர்வழிகள் தங்க‌ளின் மீதான குற்றங்களை மறைக்கும்  வண்ணமும்,சுருட்டிய பணத்தைப் பாதுகாக்கும் வண்ணமும்,அரசியல் அதிகாரத்தை அடையும் பொருட்டும் என பல்வேறு காரணஙக்ளுக்காய் பத்திரிகை ஆரம்பிப்பது கடந்த சில வருடங்களில் தமிழ் நாட்டில் அதிகரித்துக் கொண்டே வருகிறது.

சன் குழுமம்,புதிய தலைமுறை,நியூஸ் 7, மடிப்பாக்கம் வேலாயுதத்தின் G  தொலைக்காட்சி,புதிய வாழ்வியல் இதழ்,வின் தொலைக்காட்சி,ஜன்னல் என இந்த வரிசை முடிவற்றது.

இந்த வரிசையில் இடம்பெற்ற நாளிதழ் தான் 'தின இதழ்.' பல்வேறு சுயநிதிக்கல்லூரிகளை ஆரம்பித்துச் சுரண்டியதற்குப் பாதுகாப்புத் தேடும் பொருட்டு கல்வி வியாபாரியால் ஆரம்பிக்கப்பட்டது தான் 'தின இதழ்'.

தனது நாளிதழில் தமிழ்நாட்டை ஆளும் அரசுக்கு எதிராகவும்,மத்தியில் ஆளும் அரசுக்கு எதிராகவும் ஒரு வரி கூட எழுத மாட்டார். 'தமிழரசு' பத்திரிகையின் தினசரிப் பதிப்பாக வருகிறது என்றால் மிகையில்லை. இவரது பத்திரிகையின் நோக்கம் எதுவென்று எளிதில் புரியும்.

Sri muthukumaran institute of technology.Meenakshi amman dental college.


ற்ற பேர்வழிகள் தாஙகள் ஆரம்பித்த நிறுவனங்களில் சம்பளத்தை ஓரளவிற்கு கணிசமாகவும் சரியான நேரத்திலும் கொடுத்தாலும் தின இதழ் முதலாளி ராதாகிருஷ்ணனோ அதிலும் ஏமாற்றுப் பேர்வழி. வேலை செய்யும் தொழிலாளிக்கு அடிமாட்டு தொகையில் தான் சம்பளம் கொடுப்பார்.அதையும் ஒழுங்காய் கொடுக்க மாட்டார். ஆரம்பிக்கப்பட்ட காலத்தில் இருந்து எந்த மாதமும், பத்தாம் தேதிக்குள் சம்பளம் கொடுத்த வரலாறு இல்லை.அதிலும் கடந்த சில மாதங்களாய் 20 ஆம் தேதி வரைக்கும் கூட இழுத்தடிக்கப்பட்டு வந்தது. இந்த மாதமோ மிக கொடுமை.

இந்தப் பதிவு எழுதும் 24 ஆம் தேதி (செவ்வாய்க்கிழமை) ஆகி விட்டது. ஆனால் கடந்த 2015 ஜனவரி மாதச் சம்பளம் வேலை பார்த்த சுமார் 80 க்கும் மேற்பட்ட ஊழியர்களுக்கு இன்னும் வழங்கப்படவில்லை. சுயநிதிக்கல்லூரிகளின் மூலம் பல நூற்றுக்கணக்கில் கோடிகளைக் குவித்து வைத்திருக்கும் இந்த பேர்வழிகளுக்கு மாதம் முழுவதும் வேலை பார்த்த ஊழியர்களுக்கு சம்பளம் கொடுக்க மனம் வருகிறதா பாருங்கள்.அனைத்து ஊழியர்களின் ச்மபளமும் மொத்தமாக அதிக பட்சம் 30 லட்சத்துக்கு குறைவாகத்தான் வரும்.

தங்களது பள்ளி,கல்லூரிகளில் படிக்கும் மாணவர்களிடம் கட்டாய நன்கொடைகளை செர்க்கையின் பொழுதும்,வருடம் முழுமைக்குமான கல்விக் கட்டணங்களை முதல் நாளிலேயே வாங்கும் இந்த சுயநிதிக் கொள்ளையர்கள் தாங்கள் நடத்தும் பத்திரிகையில் பணிபுரியும் ஊழியர்களுக்கு வேலை பார்த்த சம்பளத்தை அடுத்த மாதம் முடிவடைய இருக்கும் தருவாயிலும் கொடுக்காமல் ஏமாற்றுவது எப்படிப்பட்ட பித்தலாட்டக்காரர்கள் என்பது விளங்கும்.

வாயைக்கட்டி, வயிற்றைக்கட்டி சொற்ப சம்பளத்துக்காய் மாதம் முழுதும் வேலை பார்த்த ஊழியர்கள் எப்பொழுது சம்பளம் வரும் என கடந்த 20 நாட்களாய் வயிற்றெரிச்சலில் இருக்கின்றனர்.ஆனால் அலுவலகத்தில் பதில் சொல்லத்தான் ஆள் இல்லை. எடிட்டர் குமாரோ வேலை வாங்குவதில் ஆர்வம் காட்டுகிறாரே தவிர பத்திரிகையை நடத்தும் பேர்வழி கவனத்துக்கு சம்பளப் பிரச்சனையைக் கொண்டு போகவே இல்லை. அவரைத் தவிர 'தின இதழ்' முதலாளி தொடர்பில் அலுவலகத்தில் யாரும் இல்லை.

இதனால் பொறுத்துப் பொறுத்துப் பார்த்த நிறுவனத்தின் ஊழியர்கள் இன்று மாலை கூடி ஒரு முடிவு எடுத்திருக்கிறார்கள். பெரும்பாலோனோரின் ஒப்புதல் இதற்கு பெறப்பட்டிருக்கிறது. வரும் வெள்ளிக்கிழமைக்குள் (27 ஆம் தேதி) சம்பளம் கொடுக்கவில்லை என்றால் ஈரத்துணியை வயிற்றில் கட்டி  தொடர்ச்சியாகப் போராடி அரசின் கவனத்திற்கு தங்கள் பிரச்சனைகளுக்குத் கொண்டு செல்வது என முடிவெடுத்திருக்கிறார்கள்.

இதிலாவது தீர்வு கிடைக்குமா..? அல்லது ஏமாற்றுப் பேர்வழிகள் ஈரத்துணியுடன் இவர்களை  பட்டினியில் சாக விடுவார்களா..?

பொறுத்திருந்து பார்ப்போம்.


குறிப்பு

தின இதழ் எடிட்டர் குமார் நேற்று மட்டும் லே அவுட் ஆர்டிஸ்டுகளுக்கு சில ஆயிரம் ஊதியம் தன் கையில் இருந்து அவசர உதவியாய்க் கொடுத்திருக்கிறார். அது என்ன லே அவுட் ஆர்ட்டிஸ்டுகள் மீது மட்டும் தனிப்பாசம் என அனைவருக்கும்  ஆச்சரியம்.
அது வேறொன்றுமில்லை. ஜெயலலிதா பிறந்த நாள் விளம்பரம் பக்கம் பக்கமாய் இரண்டு நாட்களாய் வருகிறது.அதில் பெரும்பாலானவற்றை எடுத்தவர் எடிட்டர் குமார். அதற்காய் இவருக்கு கமிஷன் 20% இது மட்டும் லட்சத்தை தொடுமாம். விளம்பரம் வெளிவராவிட்டால்  கமிஷன் போய் விடும்.  வடிவமைக்கும் லே அவுட் ஆர்டிஸ்டுகள் சம்பளம் வராத‌ கடுப்பில் இருக்கும் பொழுது அவர்களை  கொஞ்சம் மகிழ்ச்சிப்படுத்தவே அவர் கையில் இருந்து உதவி. அதனால் தான் இந்த திடீர் பாசம்.

எலி அம்மணமாய் ஓடுகிறது என்றால் சும்மாவா....?

Thursday, 12 February 2015

புதிய தலைமுறை- வீதியில் வீசப்பட்ட ஊழியர்கள்...!



சென்னை பீட்டர்ஸ் சாலை,சரவண பவன் ரெஸ்டாரண்ட் முதல் மாடி.

ஊடகவியலாளர்கள் பார்த்தசாரதி,பெஞ்சமின்,அன்பரசு சந்திப்பு.

"ரொம்ப நாள் கழிச்சி பார்க்குறோம். என்ன நடக்குது பத்திரிகை உலகத்துல ? "

"ஆமாம்.நிறைய பேசணும்." பெஞ்சமின்

இங்க அண்ணாச்சி நம்ம பர்சைக் காலி பண்ணிடுவாரே..? அடுத்த பில்டிங் செல்ப் சர்வீஸ் போயிருக்கலாம். அன்பரசு பர்ஸ் கனம் குறித்துக் கவலைப்பட்டார்.

"காசு கொஞ்சம் அதிகம் தான். ஒரு காபி குடிச்சுட்டு  ஒரு மணி நேரம் ஏ.சி.யில உட்கார இதை விட்டா வேறு இடம் கிடையாது. அங்க நின்னுக்கிட்டே இருக்கணும்."

"விகடன் எம்.டி. பாலசுப்ரமணியம் இறந்ததுக்கு போனீங்களா..? " பெஞ்சமின் ஆரம்பித்து வைத்தார்.

அஞ்சலி...


"ஆமாம். பெரும்பாலும் ஊடக நெறிகளின் படியும் பணி புரியும் தொழிலாளர்களின் மீது கரிசனத்துட‌னும் வாழ்ந்த சில முதலாளிகளில் அவரும் ஒருவர். அவருக்கு நம்ம அஞ்சலியை செலுத்திடுவோம். அவர் குறித்து விகடன் ஊழியர்கள் உட்பட ஊடகவியலாளர்கள் அனைவரும் நிறைய பதிவு செய்துட்டாங்க. இணையம் உட்பட எல்லா ஊடகங்க‌ளிலும் வந்திருக்குது."

"ஆமாம்.அந்திமழையில் ஜி.கவுதம் ஒரு இரங்கற்பா எழுதியிருந்ததையும் படிச்சேன்."

"விகடன் முதலாளி மறைவை ஒட்டி 'தமிழ் இந்து'நாளிதழ் வெளியிட்ட ஒரு கட்டுரை சர்ச்சை ஏற்படுத்தியதுன்னு சொன்னாங்களே..? "அன்பரசு.

"ஆமாம். சமஸ் சில வாரங்களுக்கு முன் செய்த அவரது நேர்காணல் ஒன்றை விகடன் பாலசுப்ரமணியம் இறந்த மறுநாள் வெளியிட்டு 'எனக்குப் பிடித்த பத்திரிகை குமுதம்-விகடன் பாலசுப்ரமணியம் கடைசிப் பேட்டி அப்படின்னு தலைப்பு வைத்திருந்தாங்க."

"இது கண்டிக்கப்ப‌ட வேண்டிய குசும்பு தான். ஒருத்தர் மறைவுக்குப் பின் வரும் அவரது பேட்டியில் வெற்றுப் பரபரப்பை உண்டாக்கும் கோக்குமாக்கான தலைப்பைத் தவிர்த்திருக்கலாம். "

"நிச்சயமா. தமிழ் இந்து ஆசிரியர் அசோகனும்  நடுப்பக்க பொறுப்பாளர் சமசும் இதன்னால விகடன் மேல்மட்ட ஆட்கள் எல்லோர் கிட்டயும் கடுமையா திட்டு வாங்குனாங்க."

"இதன் காரணமா சமஸ் துக்க வீட்டிலும் ஒரு ஓரமா அமைதியா, கவுண்டமணியிடம் திட்டு வாங்கின நடிகர் செந்தில் மாதிரி ஒருவித பாவமான‌ முகத்துடன் இருந்தார். இதை விட இன்னொரு முக்கியமான விஷயம் விகடனின் நீண்ட நாள் ஊழியர்,ஆ.வி.ஜு.வி.போன்றவற்றின் முன்னாள் ஆசிரியர் அசோகன் கடைசி வரைக்கும் இறப்பு வீட்டுக்கு வரலைன்னு சொல்றாங்க.

"உண்மை தானா..? நம்பவே முடியலை..எதுக்கும் சரி பார்த்துக்கங்க..எதிரிகளானாலும்  இறப்புக்கு வந்து அஞ்சலி செலுத்துவது தானே நம்ம மரபு. இங்கோ வேலை கொடுத்த முதலாளி கூட...!"

"அது நம்மைப் போன்றவர்களுக்கு. இன்னொரு முக்கிய விஷயம்.இன்னைக்கு 'தி இந்து' ஆசிரியர் பொறுப்பு அசோகனுக்கு கிடைத்ததற்கும் மறைந்த பாலசுப்ரமணியம் தான் காரணம்."

"அப்படியா..? "

தனது ஊழியர்களுடன் விகடன் எம்.டி.மறைந்த பாலசுப்ரமணியம்


"ஊழல் காரணமாக விகடனில் அசோகனுக்கும் சீனிவாசனுக்கும் பிரச்சனை வந்த பின்னால் அசோகனை மொத்தமா வெளியே தள்ள இப்ப இருக்கும் முதலாளி சீனிவாசன் முடிவு செய்யுறார்.அப்ப பாலசுப்ரமணியம் தான் அவரைக் காப்பாற்றி பதிப்பாளரா இருந்துட்டு போகட்டுமுன்னு சீனிவாசன் கிட்ட சொல்லி காப்பாத்துறார்.

அதுக்கு பிறகு சில காலத்தில் 'தி இந்து' தமிழ் ஆரம்பிக்கும் பொழுது தன்னை ஆசிரியர் பொறுப்புக்கு ப‌ரிந்துரைக்க பாலசுப்ரமணியத்திடம் அசோகன் சொல்றார். அவரும் என்.ராமிடம் தனக்கு இருக்கும் நட்பை பயன்படுத்தி இவரைப் பரிந்துரை செய்யுறார்.அதனால் தான் இவரை விட திறமையானவர்கள் நிறையப் பேர் பரிசீலனையில் இருந்தாலும் இவருக்கு லக் அடிக்குது. அதற்குப்பிறகு விகடன் பதிப்பாளரை விட்டு வெளியேறுறார். இன்றைக்கோ தனது இந்த நிலைக்கு காரணமானவர் மறைவுக்கு கூட போகலை. "

" நீங்க சொல்றதை நம்பவே முடியலை. எதுக்கும் சரி பார்த்துடுங்க.என்னடா உலகம் இது.நன்றி கெட்ட மனிதர்கள்." பார்த்தசாரதி சலித்துக் கொண்டார்.

ளுக்கொரு காபியை ஆர்டர் செய்து விட்டுப் பேச்சைத் தொடர்ந்தார்கள்.



"எந்த தொலைக்காட்சியைப் பார்த்தாலும் இமான் அண்ணாச்சி வர்ற‌ விளம்பரத்துக்கு போட்டியா 'ஜன்னல்- சமூகத்தின் சாளரம்' அப்படின்னு புதிய பத்திரிகை விளம்பரம் வருதே ? அது யாருங்க..புதுசா கிளம்பியிருக்காங்க.? " அன்பரசு அலுத்துக் கொண்டார்.

"யோக்கிய சிகாமணிகளா இங்க வரப்போறானுங்க.புதிய தலைமுறை,மாறன் குடும்பம்,ஜி டிவி,நியூஸ் 7 மாதிரியான கும்பல்கள் மாதிரி தான் இருக்கும். தாங்கள் செய்யும் அயோக்கியத்தனத்தில் இருந்து தங்க‌ளைப் பாதுகாக்க ஆரம்பித்திருப்பாங்க."

அதானே..?

"'ஜன்னல்' பத்திரிகை முதலாளிகள் இதுக்கு முன்னாடி ரியல் எஸ்டேட்,சீட்டு,எம்.எல்.எம். மாதிரி வணிகம் செய்துக்கிட்டிருந்தவங்க.அது தான் இவர்கள் பிழைப்பு.

அதில் கணக்கு வழக்கு இல்லாத பணம். மதுரையில் விசாலட்சுமி மில் ரொம்பப் பழமையானது.அதை நூற்றுக்கணக்கான கோடி கொடுத்து வாங்கியிருக்காங்க.அது மட்டுமல்லாமல் ராமநாதபுரம் மன்ன‌ருக்கு சொந்தமான பல கோடி மதிப்புள்ள நிலம் குற்றால மலையை ஒட்டி இருக்குது.அதையும் வாங்கியிருக்காங்க. நான் சொன்னது ஒரு சில பரிமாற்ற‌ங்கள் தான்.

இவ்வளவு கறுப்பு பணமும் சொத்தும் குறுக்கு வழியில் பத்து வருடஙக்ளுக்குள் வந்தது தான்.அதுக்கு ஒரு பாதுகாப்பு வேண்டாமா என்ன..? அதனால் தான் இப்ப முதலில் வார பத்திரிகை ஆரம்பித்திருக்காங்க.அடுத்து நாளிதழ்,தொலைக்காட்சி,அரசியல் பத்திரிகை என தொடர்ச்சியா ஆரம்பிக்குற திட்டம் இருக்காம்."

" நாட்டைத் குட்டிச்சுவரா ஆக்காமல் விட மாட்டாங்கன்னு சொல்லுங்க. " அன்பரசு

"ரி இவங்க கதை இருக்கட்டும். இதைப் போல புதியதாக இரண்டு நாளிதழ்கள் வரப்போறதா சொல்றாங்களே..?"

ஆமாம்.திருமாவளவன் மற்றும் வைகோ சார்பா ஆளுக்கொரு  தினசரி கொண்டு வராங்க.

"திருமா ஆதரவு நாளிதழுக்கு எஸ்.சரவண‌குமார் ஆசிரியர் ஆகப்போறாருன்னு சொல்றாங்க. ஆனால் கொஞ்சம் தாமதமாகலாம். வைகோ சார்பு நாளிதழை அவர் கட்சியைச் சேர்ந்த இமயம் தொலைக்காட்சி உரிமையாளர் ஜெயராஜ் ஆரம்பிக்கப் போறார்."

"வைகோ செய்தியை தந்தி உட்பட எல்லா முதலாளியும் வரிந்து கட்டித்தானே வெளியிடுவாங்க. அப்புறம் எதுக்கு தனி நாளிதழ்.?" பார்த்தசாரதி.

"அவருக்கும் தந்திக்கும் இப்ப பஞ்சாயத்து இருக்கு.தந்தியின் ராஜபக்க்ஷே ஆதரவு பேட்டியை எதிர்த்து ஆர்ப்ப்பாட்டம் செய்தார்."

நாய் நிகழ்ச்சி நடத்திய‌ ஹரிஹரன்


"ஆமா. தந்தி தொலைக்காட்சி எடுத்த நேர்காண‌லில் இனப்படுகொலை பற்றி ஒரு கேள்வியும் ராஜபக்க்ஷேவிடம் கேட்கலையே..ஏன்..? அவன் சொன்னதை அப்படியே வெளியிட அவனுக்கு பி.ஆர்.ஓ.இருக்காங்க. அதுக்கு எதுக்கு தந்தி டிவியும் ஹரிஹரனும்..?" பெஞ்சமின் கொந்தளித்தார்.

"ஹரிஹரன் நாய், நிகழ்ச்சி நடத்த தான் லாயக்குன்னு தெரியுது. அப்புறம் ஆர்ப்பாட்டம் பண்ணாமல் என்ன செய்வாங்க.?"

"இதுக்கு எதிரா ஆர்ப்பாட்டம் அறிவித்த வைகோ வழக்கமான சடங்கா அது நடக்குமுன்னு எதிர்பார்த்தார். ஆனால் யாரும் எதிர்பாராமல் தினத்தந்தி வளாகத்தில் செருப்பு வீசப்பட்டது. இதனால் தந்தி நிர்வாகத்துக்கு கடும் கோபம்."

"யார் வீசுனாங்க..? "

தந்தி அலுவலகம் முன்பு ஆர்ப்பாட்டத்தில்


"வைகோ,வேல்முருகன் கட்சி ஆட்களை கை காட்டித் தப்பிக்கப் பார்த்தார்.வேல்முருகன் எங்களுக்குத் தெரியலைன்னு பதில் சொன்னார். மொத்தத்தில் இப்ப ரெண்டு பேர் செய்தியும் தந்திக்காரன் போடுவதில்லை."

"இதனால் வைகோ ரொம்ப அப்செட். அதனால் இதர பெரிய ஊடகங்கள் மீது அதிக அக்கறை காட்டுறார்."

"அதனால் தான் தொலைபேசி இணைப்பு முறைகேட்டில் கைது செய்யப்பட்ட மாறன் கூட்டாளிகளை பத்திரிகை ஊழியர்கள் கைதுன்னு திரித்து சொல்லிக் கூச்சமில்லாமல் கண்டனம் தெரிவித்தாரோ..? "

அரசியல்வாதிகளிடம் உண்மையை மட்டும் எதிர்பார்ப்பது மடைமை. அது மட்டுமல்லாமல் கே.டி.க்கள் பயன்படுத்திட்டுத் தூக்கி எறியும் இயல்பு உள்ள‌வர்கள்.அவர்களுக்கு ஆதரவு தெரிவிப்பது எதுக்கும் பயனளிக்காது.
 இதனால் தான் தனக்குன்னு புது நாளிதழ் வருவதிலும் அதிக அக்கறை செலுத்துறார்.

தந்தி ஆர்ப்பாட்டத்தில் நடந்த கல் வீச்சுக்கு வேல்முருகனைக் குற்றம் சாட்டினாலும் அவர் கூடத் தொடர்பில் தான் இன்னும் இருக்கார். 'இம‌யம்' தொலைக்காட்சிக்காக வைகோ நேர்காணலையும் வேல்முருகன் செய்திருக்கார்.

வைகோ வை நேர்காணல் செய்யும் வேல்முருகன்.
பக்கா அரசியல்வாதிகள் முன்பு அடக்க ஒடுக்கமாக வியப்புடன், சூழல் 'போராளி' கோ.சுந்தர் ராஜன்.


" ம்ம்ம்.அரசியல் வாதிகள் யாரும் யாருடனும் சேர்ந்துக்கிடலாம். ஆனால் 'பூவுலகின் நண்பர்கள்' என்.ஜி.ஓ.நடத்துற‌வங்க, பாழாய்ப்போன அரசியல்வாதிகள் பின்னாடி எதுக்குப் போறாங்க..?

என்.ஜி.ஓ.ஆரம்பிக்கும் பொழுது தங்களை வித்தியாசமா காட்டிக்கிட வேண்டியது. அப்புறம் ஊடகங்களின் துணையுடன் ஒரு அடையாளம் கிடைத்தவுடன், எதற்கும் விலை போகத் தயாராய் இருக்கும்,மக்கள் பிரச்சனைகளின் போராட்டத்தை நீர்த்துப்போகச் செய்யும் அரசியல் வாதிகளுடன் தனிப்பட்ட உறவைப் பேணுவது என திட்டமிட்டு நடந்து கொள்கிறார்கள். இதுக்கு முன்னாடி வைகுண்டராஜன் டிவி அலுவலகம் சென்று வந்தார் என நாம் ஒரு புகைப்படத்துடன் கூடிய செய்தி வெளியிட்டிருந்தோம். இப்படியே போனால் அதிகார வர்க்கத் தொடர்பு அடுத்து எளிதில் கிடைக்கும்.

"நல்லாத் தான் இருக்கு சூழலைக் காக்கும் நிகழ்ச்சி நிரல்."

ழக்கம் போல் தாமதமாய் வந்த காபியை எடுத்துப் பருகிக் கொண்டே பெஞ்சமின் ஆரம்பித்தார்.

 "தினமலர் நாளிதழ் மாற்றத்தைக் கவனிச்சிங்களா..?"

"ஆமாம். 'தினமலர்' தனது வாசகர்களை 'தமிழ் இந்து' கவர்ந்து விடக்கூடும் எனும் எண்ணத்தில் தினமும் ஒரு துறை குறித்த செய்திகளை ஒரு பக்க இணைப்பா வழங்குது. மகளிர்,சினிமா,கல்வி,பெண்கள்,அறிவியல் பகுதி என பலதுறைகள் குறித்தும் எளிய நடையில் மிக அருமையா இருக்குது. தொடர்ந்து படிக்கிறேன்."

"அப்படியா ? நானும் பார்க்குறேன். "

அவர்களும் புதியதாய் சில பத்திரிகைகள் ஆரம்பிக்கப்போறாங்கன்னு சொல்றாங்களே..?

ஆமாம். 'அலப்ஸ்' அப்படின்னு பேராம்.இன்னொரு பத்திரிகை 'புதிய அலை' என்றும் சொல்றாங்க.

அதுக்காய் கவுதம சித்தார்த்தனைத் தேர்ந்தெடுத்திருக்காங்க. சிறு பத்திரிகை நடத்தி வந்த அவர் 'குமுதம் தீராநதி'யில் பணியாற்றினார். இப்ப 'தினமலரில்' இணைந்திருக்கிறார்.

"அலப்ஸ் பேரப்பாரு.'தினமலர்' காரன் வைக்குற தலைப்பு மாதிரி கேவலமா இருக்கு."

ம்.அவங்க பங்குக்கு அவங்க ஆரம்பிக்கட்டும்.

'தி இந்து'  தமிழ் நாளிதழ் செய்தி எதுவும் உண்டா..?

"வெள்ளி,சனி,ஞாயிறு அன்று விலை 6 ரூ.ஆக்கிட்டாங்க. விற்பனையில் முதல் நிலையில் இருக்கும் தினத்தந்தி,தினகரனே விலை குறைவு தான். இவங்க கொடுக்கும் பக்கங்களை விட அதிகம் தர்றாங்க. ஆனா தினமணியுடன் போட்டி போடும் 'தி இந்து'  விலையை உயர்த்தியிருக்குது. இந்த நிலையிலேயே இப்படின்னா விற்பனை இன்னும் அதிகமாச்சுன்னா இவங்க வச்சது தான் விலைன்னு ஆகிடும். "

"விளம்பரம் அதிகம் வராததினால் தான் இந்த நிலை என நினைக்கிறேன். அதுக்கு நம்ம பாக்கெட்ல எதுக்கு கை வைக்கணும்.?"

காபி காலியானது .




'விகடன் விருதுகள்' பார்த்தீர்களா..?

ஆமாம். பார்த்தேன். எது நடந்தாலும் எவ்வளவு திட்டினாலும் கொஞ்சமும் கூச்சமே இல்லாமல் அவங்க கம்பெனி சீரியலுக்கு அவங்களே அவார்டு கொடுக்கும் கேவலம் மட்டும் நிக்கவே இல்ல. இந்த முறையும் அவங்க நிறுவன தெய்வமகள் சீரியலுக்குத் தான் விருது.

அதுவும் இல்லாமல் 'விஜய் டிவி' திவ்யதர்ஷினிக்கு தொடர்ந்து நான்கு வருசமா சிறந்த தொகுப்பாளினி விருது கொடுத்துக்கிட்டிருக்காங்க. விகடன் ஒட்டுமொத்த டீமும் இதுல  பாரபட்சம் இல்லாமல் சொக்கிப்போய்க் கிடக்காங்க போல தெரியுது. கொஞ்சம் தெளிந்து மற்ற தொகுப்பாளினிகள் நடத்துற நிகழ்ச்சியையும் பார்க்கணும்.

அதுவும் இல்லாமல் 'சிறந்த தொலைக்காட்சி சேனல்' அப்படின்னு 'சன் மியூசிக்' சேனலுக்கு அவார்டு கொடுத்திருக்காங்க. 'சிறந்த பொழுதுபோக்கு சேனல்' அப்படின்னு கொடுத்திருந்தா சரியா இருந்திருக்கும்.

10 க்கும் மேற்பட்ட செய்தி தொலைக்காட்சிகள் இருக்கும் பொழுது 'சன் மியூசிக்' சிறந்த சேனலாத் தேர்ந்தெடுத்திருப்பது அபத்தமா இருக்கு. பொழுதுபோக்கும் சேனலை விட பிற துறைகள் குறித்த சேனலுக்கு முக்கியத்துவம் கொடுக்கலாம்.



"க்கீரன் படிச்சீங்களா..வர வர ஆபாச மேட்டர் தான் கவர் ஸ்டோரியா வருது."

"ஆமாம் நடிகை விந்தியா காதல் தோல்வி, நடிகை ஸ்ரீ திவ்யா செல்பி அப்படின்னு."

"அதிலும் நடிகை ஸ்ரீ திவ்யா அரை குறை ஆடை செல்பி மேட்டர் எழுதி நாட்டுக்கு கொணர்ந்த‌து யாரு தெரியுமா..?"

" யாரு..? "

நிருபர் மனோ சவுந்தர்.



ஆமாம். அவர் குறித்துக் கேள்விப்பட்டிருக்கேன். அந்தாளுக்கு எதுக்கு இந்த ஆபாச வேலை. இதுக்கு வேற வேலைக்கு போகலாமே..?

"அவரை விட புதிய தலைமுறை இதழில் நிருபராய் பணியாற்றும் அவர் மனைவி வினி ஷர்ப்னா பெரிய புர்ர்ரட்சியாளர் தெரியுமா..? "

ஓ.

ஆமாம். முகநூலில் எழுதுவார். படிச்சா புல்லரிக்கும்.சுகிதா ராஜினாமா தொடர்பா கலகக்குரலில் எழுதிய  ஒரு செய்திக்காய் இவனுங்களுக்கெல்லாம் புத்தி வராதுன்னு நம்மைக் கடுமையா எழுதினார்.

 தான் காதலித்து மணம் செய்து கொண்ட‌ கணவர், இன்னொரு பெண்ணின் அந்தரங்கம் குறித்து புகைப்படத்தோடு கேவலமா எழுதிய‌துக்கு எதிரா எப்படி பொங்குவாரு..? 'நக்கீரன்  கோபால்' தலைமையில் தான் மனோவை இவர் திருமணம் செய்து கொண்டார். பெண்ணின் அந்தரங்கத்தை வெளியிட்டு அவரை அசிங்கப்படுத்தியதுக்காய் ஒன்னு கண‌வரைச் சாத்தணும் அல்லது இப்படிப்பட்ட ஆளைத் திருமணம் செய்துக்கிட்டதுக்காய் தன்னைத் தானே சாத்திக்கணும்.

எல்லாம் சரிதான்.
நடிகையின் அந்தரங்கத்தை எழுதி வெளியிட்டதற்கு என்ன தண்டனை..?
ரெண்டு பேரும் பேசி முடிவுக்கு வாங்க.


// ஸ்ரீதிவ்யா இது தொட‌ர்பாய் புகார் கொடுத்தால் கண்டிப்பாய் காவல் துறை கடும் நடவடிக்கை எடுக்கும் என சைபர் கிரைம் பிரிவு காவல்துறை அதிகாரி கருத்து தெரிவித்தார் என மனோ எழுதியிருக்கார்.//

" நடிகை ஸ்ரீ திவ்யா புகார் கொடுத்தால் கண்டிப்பாய் எழுதிய மனோவையும் வெளியிட்ட‌ கோபாலையும் தான் காவல்துறையினர் அரஸ்ட் பண்ணி லாடம் கட்டுவாங்க. ஆனால் நடிகை ஸ்ரீ திவ்யா கொடுக்க மாட்டாங்க அப்படிங்குற கொழுப்பில் தான் இப்படிப்பட்ட செய்திகள் வருது. "பெஞ்சமின் கடுப்பைக் காட்டினார்.



" குமுதம் இதழில் குஷ்பூ,பாக்யராஜ்,வைரமுத்து,அனிருத்,ராஜேஷ்குமார் என பிரபலங்கள் அணிவகுப்பு அதிகமா இருக்குதே..? கவனித்தீங்களா..?"  பார்த்தசாரதி

"ஆமாம். தனது வாசகர்களை தக்க வைப்பதோடு மட்டுமல்லாமல் புதிய வாசகர்களையும் குமுதம் அதிகரிச்சுக்கிட்டே இருக்குது.  விகடன் தொடர்ந்து இரண்டாம் இடத்தில் தான் இருக்குது. ஆனால் ஆ.விகடன் மீட்டிங்ல  தொடர்ந்து முதலிடத்தில் இருப்பதாக சொல்லிக்கிட்டே இருக்காங்க. விகடன் எடிட்டோரியலில் இருப்பவர்களும் அதை அப்பாவியா நம்பிக்கிட்டு  இருக்காங்க."



புதிது புதிதா ஆரம்பிக்குற பத்திரிகைகள் பத்திரிகைகள் பத்தி பேசினோம். 25 வருடமா வந்துக்கிட்டிருந்த 'இந்தியா டுடே' தமிழ் பதிப்பு நிறுத்தப்படுதுன்னு சொல்றாங்களே..?

"ஆமாம்.நீண்ட நாளா சொல்லிக்கிட்டிருந்தாங்களாம். இப்ப முடிவு கட்டி மூட்டை கட்டப்போறாங்களாம்."

ம். அங்கே வேலை செய்யும் பத்திரிகையாளர்களுக்கு என்ன நிவாரணம் கொடுத்தாங்கன்னு தெரிய‌லை. தமிழ்,மலையாளம்,தெலுங்கு உட்பட எல்லா பதிப்பும் சேர்த்து பல்வேறு பிரிவுகளிலும் ஏறக்குறைய 200க்கும் மேற்பட்ட ஊழியர்கள் இதனால் நிர்க்கதியாய் இருக்காங்க..

அசோசியேட் எடிட்டர் கவிதா முரளிதரனை வேலைக்கு எடுத்து 3 மாதம் கூட ஆகலை. பூட்டப்போற கம்பெனிக்கு ஆசிரியர் பொறுப்புக்கு எதுக்கு ஆள் எடுக்கணும் ? அவங்க வேலையையும் பாழாக்கிட்டாங்க.

இனி பாதிக்கப்பட்ட தொழிலாளர்கள் என்ன செய்யப்போறாங்கன்னு தெரியலை. தொழிற்சங்க நிர்வாகங்கள் இதற்கு எதுவும் நடவடிக்கை எடுக்கப் போறாங்களான்னு தெரியலை."

ஒரு பத்திரிகை மூடிட்டது பத்திக் கவலைப்படுறோம். அதைப்போல நிகழ்ச்சி ஒன்னு நிறுத்தப்பட்டு பணி செய்த ஊடகவியலாளர்கள் வெளியே எறியப்பட்டது குறித்து யாருக்கும் கவலை இல்லை.இன்னும் சொல்லப்போனால் செய்தியே வெளியே வரலை.

என்னாச்சு..?



'புதிய தலைமுறை' தொலைக்காட்சியில் 'ரவுத்திரம் பழகு' அப்படின்னு ஒரு நிகழ்ச்சி.

" பெயரே ரொம்ப டெரரா இருக்கே..? "

"ஆமாம்."

திடீருன்னு அந்த நிகழ்ச்சியை ஊத்தி மூடிட்டாங்க. அது மட்டும் இல்லாமல் நிகழ்ச்சியில் பணி புரிந்த 30 க்கு மேற்பட்டவர்களை வீட்டுக்கு அனுப்பிட்டாங்க.

என்னய்யா அநியாயமா இருக்குது..? அந்த நிகழ்ச்சியை நிறுத்திட்டா என்ன..? அவங்க தொலைக்காட்சியில் எத்தனையோ நிகழ்ச்சிகள் ஒளிபரப்பாகுது. கைவசம் 3 சேனல் இருக்குது. எத்தனையோ வேலைகள் இருக்குது. அதில் இவர்களைச் சேர்த்துக்கிடலாமே..? இவ்வளவு நாள் வேலை பார்த்தவங்க இப்ப நடுத்தெருவில் நிற்பாங்களே..?

"அதான்.பிற‌ ஊடகங்களில் நிம்மதியா வேலை பார்த்துக்கிட்டிருந்தவங்களை அதிகச் சம்பளம் பேசி ஆசை காட்டி அழைத்துட்டு வந்துட வேண்டியது. ,புதிய இடத்தில் கிடைத்த அதிக சம்பளத்தில் தங்கள் வாழ்க்கை முறையை சொகுசா மாற்றிக்கிட்ட கொஞ்ச காலத்தில், அவர்களை தூக்கி எறிந்துட வேண்டியது. நிம்மதியாய் செய்துக்கிட்டிருந்த வேலையும் போய் நிர்க்கதியாய் நடுத்தெருவில் நிற்குறாங்க."

"ஐ.டி.ஊழியர்கள் மட்டுமில்ல.ஊடகத்துறையிலும் இது தான் நிலை. அதிலும் புது ஊடகக் காரர்களான புதிய தலைமுறை போன்ற மன்னராங் கம்பெனிகள் வந்த பின்பு இது அதிகமாய் காணப்படுகிறது.

டி.சி.எஸ்.போன்ற நிறுவனங்களில் காணப்படும் ஆட்குறைப்பு பற்றி ஊடகங்களில் நிபுணர்கள் நரம்பு புடைக்க விவாதிக்கிறார்கள். ஆனால் ஊடகங்களில் நடக்கும் இது போன்ற அநியாயங்களை விவாதிக்க நாதி இல்லை. புதிய தலைமுறை வேலை பறிப்பு நடந்து 2 மாதங்கள் ஆகப்போகுது.ஒரு சத்தமும் இல்லை."

அதானே ? அதிலும் 'புதிய தலைமுறை'யில் நிகழ்ச்சிகளுக்கு வைக்கும் பெயரைப் பாருங்கள்.'ரவுத்திரம் பழகு','நேர்பட பேசு','புதுப்புது அர்த்தங்கள்'.
ஆனால் நடப்பதோ நேர் எதிர்.

'ரவுத்திரம் பழகு' நிகழ்ச்சியில் வேலை பார்த்தவங்க உண்மையில் ரவுத்திரமா நடநதிருந்தா ஒரு முடிவு தெரிந்திருக்கும்.

காபிக்கு பணமும் டிப்சும் கொடுத்து சபை கலைந்தது.